पपई दरासाठी समिती स्थापन प्रक्रियेबाबत प्रश्नचिन्ह

नंदुरबार : पपई दरांबाबत प्रकाशा (ता. शहादा) येथे झालेल्या एका संघटना व शेतकऱ्यांच्या बैठकीत जयनगर व वडाळी (ता. शहादा) येथील दोन शेतकऱ्यांनी संघटनेच्या समिती गठित करण्याच्या प्रक्रियेबाबत प्रश्‍नचिन्ह उपस्थित केले. या वेळी किरकोळ शाब्दिक वाद झाला. यातच काही दिवसांपूर्वी पपईचे दर ४.२५ रुपये प्रतिकिलो असे ठरले आहे. याबाबत प्रशासनाने सूचना दिलेल्या असतानाही निर्देशित दरात खरेदी केली जात नसल्याच्या तक्रारी पपई उत्पादकांमध्ये आहेत. 

बैठकीत जे शेतकरी उपस्थित आहेत, त्यांना गृहीत धरून किंवा समोर ठेवून चर्चा करा. जे शेतकरी घरी आहेत, त्यांची समितीत नियुक्ती करू नका किंवा त्यांचा मुद्दा बैठकीत घेवू नका, असा मुद्दा या दोन्ही शेतकऱ्यांनी मांडला. यावरून किरकोळ शाब्दिक वादही झाला. शेतकऱ्यांच्या संघटनेने मात्र पपई उत्पादक असलेल्या शेतकऱ्यांचा समावेश या समितीत केला जाईल. शेतकरी कुठेही असोत, ते पपईसंबंधीच्या आंदोलनात असल्याने त्यांना आपण स्थान दिले पाहीजे, असा मुद्दा मांडला. काही वेळेनंतर हा वाद थांबला. 

`पपईचे दर ४.२५ रुपये, अंमलबजावणी करावी` पपईचे दर प्रतिकिलो ४.२५ रुपये असे नुकतेच निश्‍चित झाले आहेत. या दरांची अंमलबजावणी करावी. शेतकऱ्यांनी अपेक्षित दरांसाठी आपला स्वतंत्र दबाव गट तयार केला पाहिजे. पपई दराबाबतचे आंदोलन हे कुणी एका गटाचे, संघटनेचे नसून, त्यात सर्वांचा समावेश करावा, असा मुद्दा पपई उत्पादकांनी मांडला आहे.