नंदुरबार, धुळे जिल्ह्यात पपई दराचा तिढा अखेर सुटला

धुळे : नंदुरबार व धुळे जिल्ह्यात पपईच्या दरांवरून सुरू असलेला तिढा नुकत्याच झालेल्या शेतकरी व व्यापारी यांच्यासोबतच्या बैठकीत सुटला. सहा रुपये ७५ पैसे प्रतिकिलो या दरावर एकमत झाले असून, पपईची काढणी सुरू झाल्याची माहिती मिळाली आहे.  पपईला कमी दर मिळत असल्याने पपई उत्पादकांच्या समितीने काढणीला विरोध केला होता. पपई उत्पादकांनी प्रतिकिलो आठ रुपये दर मिळावा, अशी मागणी बाजार समितीसह पपई खरेदीदार व्यापाऱ्यांकडे केली होती. फक्त पाच रुपये प्रतिकिलो, असा दर व्यापारी देत होते. मागील महिन्यात एका बैठकीचे आयोजन शहादा (जि. नंदुरबार) येथील बाजार समितीमध्ये करण्यात आले होते, परंतु या बैठकीला व्यापारी, खरेदीदार अनुपस्थित राहीले. यामुळे दरांचा तिढा आणखीच वाढला आणि शेतकऱ्यांनी पणनमंत्री व इतर वरिष्ठ कार्यालयांकडे तक्रार करण्याची तयारी केली होती.  शेतकऱ्यांचा पवित्रा लक्षात घेता व्यापाऱ्यांनी नरमाई दाखवित बैठकीला उपस्थित राहण्याची तयारी केली. अखेर शहादा येथील बाजार समितीमध्ये बैठक घेण्यात आली. व्यापाऱ्यांनी सुरवातीला सहा रुपये प्रतिकिलो दर सांगितला, पण तो शेतकऱ्यांनी नामंजूर करीत सात रुपये २५ पैसे प्रतिकिलो किमान दर हवा, अशी भूमिका मांडली. त्यावर व्यापाऱ्यांनी तोडगा काढत सहा रुपये ७५ पैसे प्रतिकिलो, असा दर देण्याची तयारी दाखविली. त्यावर कमाल शेतकऱ्यांनी होकार दिला. दरांचा तिढा मिटवून पपईची काढणी सुरू झाली आहे. दिल्ली, राजस्थान, मध्य प्रदेशात पपईची निर्यात सुरू झाली आहे.  पपईला खर्चाच्या तुलनेत दर हवे आहेत. किरकोळ बाजारात तर २५ रुपये किलो या दरात विक्रेते पपई देतात. शेतकऱ्याकडून कवडीमोल दरात पपई खरेदी होते. या संदर्भात संशोधन करून कारवाई व्हावी.  - रोहित पाटील, पपई उत्पादक, वडछील, ता. शहादा, जि. नंदुरबार