द्राक्षघडांवर पेपर आच्छादन कामांना वेग

नाशिक : निर्यातीसाठी द्राक्ष परिपूर्ण व परिपक्व प्रक्रियेत असताना द्राक्षाचा रंग बदलू नये, याकरिता बागांतील द्राक्षघडांना पेपर आच्छादन करण्याच्या कामाला वेग आला आहे. नाशिक जिल्ह्यात हजारो एकर द्राक्षबागा असून, यापैकी बहुतांशी निर्यातक्षम द्राक्ष उत्पादित करणाऱ्या द्राक्षबागा आहेत.

युरोप, रशिया, चीन, बांगलादेश व इतर देशांत द्राक्ष निर्यात करण्याचा या भागाचा नावलौकिक आहे. दरम्यान निर्यातक्षम द्राक्ष उत्पादित करण्यापेक्षा द्राक्ष निर्यात करताना अनेक चाळणी प्रक्रियेच्या माध्यमातून उत्पादकांना जावे लागते. द्राक्षातील साखरेचे प्रमाण, आकारमान, रंग, वजन, दर्जा याकडे विशेष लक्ष उत्पादकांना द्यावे लागते. निर्यातक्षम द्राक्षांमध्ये या सर्व बाबींचा अंतर्भाव व्हावा, याकरिता सध्या द्राक्ष घडांना पेपर आच्छादन लावण्याचे काम सुरू आहे.

एका एकर क्षेत्रात आच्छादनासाठी इंग्रजी पेपरची 30 ते 40 बंडल लागतात. एका बंडलची किमत 200 रुपये असून पेपर लावण्याची मजुरी एकरी दहा हजार इतकी आहे. तसेच मणी काढण्याची मजुरी एकरी 5 ते 7 हजार रुपये आहे.

नाशिक जिल्ह्यातील पेठ, सुरगाणा, ननाशी या आदिवासी भागांबरोबर स्थानिक मजुरांकडून हे काम करून घेण्यात येते. निर्यात होणाऱ्या द्राक्षांचा रंग हिरवा असावा लागतो. पेपर आच्छादन केले तरच हा रंग टिकून राहतो. त्यामुळे 18 ते 20 ब्रिक्स (साखरेचे) प्रमाण राहून नैसर्गिकपणा टिकून राहतो. दरम्यान एक महिन्याच्या कालावधीपर्यंत आच्छादन ठेवावे लागते.

स्थानिक ठिकाणाबरोबर परराज्यांत द्राक्ष विक्री करावयाची असल्यास पिवळसर रंगाची द्राक्षे विक्रीसाठी योग्य समजली जातात. त्यात साखरेचे प्रमाण 22 ते 24 असावे लागते. अशी माहिती उत्पादक गणेश देशमुख यांनी दिली. निर्यातीसाठी 16 ते 20 इतके आकारमान आवश्यक असते. निर्यातीसाठी 5 किलो द्राक्षाचे नमुने तपासणीसाठी हैदराबाद, पुणे, ठाणे येथे पाठविण्यात येतात. यशस्वी चाचणी अहवालाचा रिपोर्ट सहाव्या दिवशी येतो. त्यानंतर निर्यात प्रक्रिया सुरू होते, अशी माहिती उत्पादकांनी दिली.