शेतक-यांची मिरचीपेक्षा पपई लागवडीला पंसती

नंदुरबार : ऐन लागवडीच्या वेळेस पावसाचा लहरीपणा, रोगराईमुळे वाढलेला उत्पादन खर्च आणि कापसाचा पर्याय आदी कारणांमुळे जिल्ह्यात मिरचीची लागवड कमी होत असून, यंदा सलग तिसऱ्या वर्षी या पिकाची लागवड ६०० ते ६५० हेक्‍टरवर राहील. तर, पपईसह कापूस लागवडीला यंदा शेतकऱ्यांची पसंती मिळत असून पपईचे क्षेत्र यंदा शहादा व नंदुरबारात सुमारे ४ ते ५ हजार हेक्‍टरपर्यंत पोचल्याचा अंदाज आहे.  

खानदेशात सर्वाधिक मिरची लागवड नंदुरबार व शहादा तालुक्‍यांत अधिक असते. येथील मिरची पावडर देशातील विविध बाजारपेठांमध्ये पाठविली जाते. २० जून ते १२ जुलैपर्यंत लागवड सुरू असते.  ढगाळ वातावरण व कमी तापमान लक्षात घेऊन काही शेतकऱ्यांनी सूक्ष्मसिंचनाच्या बळावर लागवड केली आहे. मागील हंगामात नंदुरबारातील गोदांमध्ये कोरडी मिरची मोठ्या प्रमाणात पडून होती. दरही पडले होते. या भीतीने मागील वर्षी लागवड फक्त ११०० हेक्‍टरपर्यंत होती. यंदाही सुमारे १ हजार हेक्‍टरपर्यंत लागवड झाली आहे. ती फारशी वाढणार नाही, असे काही शेतकऱ्यांचे म्हणणे आहे.

मिरचीला एकरी किमान ६० ते ६५ हजार रुपये खर्च येतो. मागील दोन हंगाम मिरचीला विषाणूजन्य रोगांचा फटका बसला. मागील वर्षी तर ऑक्‍टोबर, नोव्हेंबरमध्ये अनेक शेतकऱ्यांनी पीक मोडले होते. २०१५ पर्यंत लागवडीचे क्षेत्र अडीच हजार हेक्‍टरपर्यंत होते. नंतर लागवडीत घट होत गेली.

  सध्या कोरड्या मिरचीमध्ये तेजी

नंदुरबार व लोणखेडा येथे कोरड्या मिरचीसंबंधी पाच कोल्डस्टोरेज असून, त्यात फारसा साठा नाही. आंध्र प्रदेशातील (गुंटूर) मिरचीची आवक दिवाळीनंतर तर नंदुरबारमधील मिरचीची आवक ऑक्‍टोबरमध्ये सुरू होईल, असे नंदुरबारमधील मिरची व्यापाऱ्यांचे म्हणणे आहे.