परभणीत खरिपात २९ टक्के पीककर्ज वाटप

परभणी : जिल्ह्यात यंदाच्या खरीप हंगामात ५४ हजार ४७६ शेतकऱ्यांना ४०६ कोटी १७ लाख ३० हजार रुपये म्हणजेच उद्दिष्टाच्या २८.९९ टक्के पीक कर्ज वाटप करण्यात आले आहे. गतवर्षीच्या खरीप हंगामात १३८९ कोटी १ लाख १० हजार रुपयांचे पीक कर्ज वाटप करण्यात आले होते. यंदा पीक कर्ज वाटपाचे उद्दिष्ट आणि प्रत्यक्ष वाटप यामध्ये ९९४ कोटी ७३ लाख ४३ हजार रुपयांची तफावत आली आहे.

यंदा रब्बी हंगामात २८० कोटी ८३ लाख ४७ हजार रुपये पीक कर्ज वाटपाचे उद्दिष्ट आहे. परंतु, जिल्हा बॅंक तसेच ग्रामीण बॅंक वगळता अन्य बॅंकांनी अद्याप रब्बी कर्ज वाटपास सुरवात केलेली नाही. कर्जमाफी योजनेचा पीक कर्ज वाटपावर परिणाम झाला आहे, असे सूत्रांनी सांगितले.

२०१७-१८ च्या खरिप हंगामात जिल्हा मध्यवर्ती सहकारी बॅंकेला १७५ कोटी ४० लाख २० हजार रुपये, व्यापारी बॅंकांना १ हजार ७० कोटी ९५ लाख २१ हजार रुपये, महाराष्ट्र ग्रामीण बॅंकेला १५४ कोटी ५५ लाख ३२ हजार रुपये असे एकूण १४०० कोटी ९० लाख ७० हजार रुपये पीक कर्ज वाटपाचे उद्दिष्ट होते.

खरीप हंगामातील पीक कर्जाचे ३० सप्टेंबरपर्यंत वाटप केले जाते. यंदा ५४ हजार ४७६ शेतक-यांना ४०६ कोटी १७ लाख ३० हजार रुपयांचे पीक कर्ज वाटप करण्यात आले आहे. यामध्ये जिल्हा बॅंकेने ४० हजार ६८२ शेतकऱ्यांना ८७ कोटी ४३ लाख ३० हजार रुपये (४९.८५ टक्के), व्यापारी बॅंकांनी ११ हजार ८६ शेतक-यांना ३०० कोटी ३ लाख रुपये (२८.०२ टक्के), महाराष्ट्र ग्रामीण बॅंकेने २ हजार ७०८ शेतकऱ्यांना १८ कोटी ७१ लाख रुपये पीक कर्ज वाटप केले आहे.

यंदाच्या रब्बी हंगामात २८० कोटी ८३ लाख ४७ हजार रुपयांचे पीक कर्ज वाटपाचे उद्दिष्ट आहे. यामध्ये जिल्हा मध्यवर्ती सहकारी बॅंकेला ६९ कोटी ५८ लाख ३३ हजार रुपये, व्यापारी बॅंकांना १९१ कोटी १६ लाख ५६ हजार रुपये, महाराष्ट्र ग्रामीण बॅंकेला २० कोटी ८ लाख ५८ हजार रुपयांंचा समावेश आहे.

कर्जमाफीच्या अपेक्षेने यंदा शेतकऱ्यांनी पीक कर्जाचे नूतनीकरण करण्यास प्रतिसाद दिला नाही. बॅंक कर्मचारी देखील कर्जमाफी योजनेची माहिती भरण्याच्या कामात व्यस्त असल्यामुळे कर्ज वाटप कमी झाले आहे. यंदा उद्दिष्टापेक्षा ९९४ कोटी ७३ लाख ४३ हजार रुपये कमी कर्ज वाटप झाले आहे. रब्बी कर्ज घेण्यासाठी सुध्दा शेतकरी अद्याप इच्छुक नसल्याचे चित्र आहे. जिल्हा बॅंक तसेच महाराष्ट्र ग्रामीण बॅंकेने काही शेतकऱ्यांना रब्बीचे कर्ज वाटप केले असल्याचे जिल्हा अग्रणी बॅंकेच्या सूत्रांनी सांगितले.