परभणी, हिंगोलीत शेतीपिकांत पोचले कृषिशास्त्रज्ञ

परभणी, हिंगोलीत शेतीपिकांत पोचले कृषिशास्त्रज्ञ
परभणी, हिंगोलीत शेतीपिकांत पोचले कृषिशास्त्रज्ञ

परभणी ः वसंतराव नाईक मराठवाडा कृषी विद्यापीठातर्फे राबविण्यात येत असलेल्या विद्यापीठ आपल्या दारी, तंत्रज्ञान शेतावरी या विशेष विस्तार मोहिमेअंतर्गत शास्त्रज्ञांनी आजवर परभणी-हिंगोली जिल्ह्यातील ३० गावांमधील शेतकऱ्यांच्या शेतावर जाऊन विविध पिकांवरील कीड रोग व्यवस्थापन याबाबत सल्ला दिला. या मोहिमेअंतर्गत गुलाबी बोंड अळी नियंत्रण तसेच पावसाच्या खंड काळात करावयाच्या उपाययोजना यावर भर दिला जात आहे, असे सूत्रांनी सांगितले.

मराठवाडा विभागात सुरवातीला झालेल्या समाधानकारक पावसामुळे पीक परिस्थिती चांगली आहे. परंतु गेल्या १५-२० दिवसांपासून पावसाचा खंड पडल्यामुळे कीड रोगांचा प्रादुर्भाव वाढण्याची शक्यता आहे. या परिस्थितीत पीक संरक्षणाकरिता शेतक­ऱ्यांना शेतावर जाऊन सल्ला देण्यासाठी वसंतराव नाईक मराठवाडा कृषी विद्यापीठाचे कुलगुरू डॉ. अशोक ढवण, विस्तार शिक्षण संचालक डॉ. प्रदीप इंगोले यांच्या मार्गदर्शनाखाली मराठवाड्यातील आठही जिल्ह्यात विभागीय कृषी विस्तार शिक्षण केंद्रे, सर्व महाविद्यालये, कृषी विज्ञान केंद्रे, संशोधन योजना तसेच कृषी विभाग यांच्या सहकार्याने `विद्यापीठ आपल्या दारी : तंत्रज्ञान शेतावरी` ही विशेष विस्तार मोहीम राबविण्‍यात येत आहे. 

त्यासाठी वनामकृवितील कृषी तंत्रज्ञान माहिती केंद्रातर्फे परभणी आणि हिंगोली जिल्ह्याकरिता तालुकास्तरीय तंत्रज्ञान प्रसार कार्यक्रम कृती आराखडा करण्यात आला आहे. कृषी विभागाच्या समन्वयाने प्रत्येक तालुक्यातील चार गावांची निवड करण्यात आली. आजपर्यंत या दोन जिल्ह्यातील विविध तालुक्यांतील ३० गावातील शेतकऱ्यांच्या प्रत्‍यक्ष शेतावर भेट देऊन चर्चेद्वारे सल्ला देण्यात आला. 

परभणी, हिंगोली जिल्ह्यासाठी शास्त्रज्ञांच्या चमूचे प्रमुख डॉ. यू. एन. आळसे, डॉ. मिर्झा बेग, डॉ. एस. जी. पुरी, डॉ. सी. बी. लटपटे आहेत. चमूमध्ये कृषिविद्या, कीटकशास्त्र, वनस्पती विकृतीशास्त्र, उद्यानविद्या आदी विषयतज्ज्ञांचा समावेश आहे. याअंतर्गत छोटे मेळावे, गटचर्चा, मार्गदर्शन, प्रक्षेत्र भेट अशा स्वरूपाचे कार्यक्रम घेतले जात आहेत. माळधानी (ता. जि. हिंगोली) येथील शेतावर विस्तार शिक्षण संचालक डाॅ. प्रदीप इंगोले, कृषी विद्यावेत्ता डाॅ. यू. एन. आळसे, उपविभागीय अधिकारी बी. एच. कच्छवे यांनी भेट देऊन हळद पिकांची पाहणी केली.

मागणी अाधारित काटेकोर विस्तार शिक्षण ः इंगोले हंगामी खरीप पिके, ऊस, फळपिके, भाजीपाला आदी पिकांचे संरक्षण, मूलस्थानी जलसंधारण आदी विषयांवर शेतकऱ्यांना मार्गदर्शन केले जात आहे. खास करून सध्याच्या अवर्षण परिस्थितीमध्ये पीक व्यवस्थापन, पीक संरक्षणामध्ये प्रामुख्याने बोंड अळी व्यवस्थापन यावर शेतक­ऱ्यांना सल्ला देण्यात येत आहे. मागणी अाधारित काटेकोर विस्तार शिक्षण असे मोहिमेचे स्वरूप आहे, असे इंगोले यांनी सांगितले.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com