नागपूर विभागात अडीच लाखांवर कर्जदार शेतकऱ्यांचा पीकविमा योजनेत सहभाग

नागपूर   ः पीकविम्याचा लाभ मिळत नसल्यामुळे विमा उतरविण्याकडे शेतकऱ्यांनी पाठ फिरविली आहे. परिणामी, नागपूर विभागातील सहा जिल्ह्यांतील केवळ ४९०८ बिगर कर्जदार शेतकऱ्यांनीच पीकविमा काढण्यासाठी पुढाकार घेतल्याचे वास्तव समोर आले आहे. याउलट कर्जदार शेतकऱ्यांना विमा सक्‍तीचा असल्याने त्यांची संख्या २ लाख ५७ हजार ७९८ वर पोचली आहे.

कर्जदार शेतकऱ्यांना विमा सक्‍तीचा करण्यात आला आहे. त्यामुळे या शेतकऱ्यांच्या भरवशावरच ही योजना तरली आहे, असे म्हटले तरी वावगे ठरणार नाही. गेल्यावर्षी पीकविमा काढणाऱ्या काही शेतकऱ्यांना अवघा १०० ते १५० रुपयांचा परतावा मिळाला होता. नागपूर विभागात गेल्यावर्षी विमा काढणाऱ्या अडीच लाख शेतकऱ्यांपैकी केवळ ५४ हजार शेतकऱ्यांनाच पीकविम्याचा लाभ दिला गेला.

परिणामी, पीकविमा योजना फसवी असल्याची ओरड शेतकऱ्यांमधून होत होती. पीकविम्यावर विश्‍वासच नसल्याने बिगर कर्जदार शेतकऱ्यांनी याकडे पाठ फिरविल्याचे वास्तव आहे. त्यानुसार नागपूर विभागातील सहा जिल्ह्यांत केवळ ४९०८ शेतकऱ्यांनीच पीकविमा उतरविला आहे.