शेतकऱ्यांच्या जीवनात निश्चित परिवर्तन होईल : पाशा पटेल

नारायणगाव, जि. पुणे : काॅंग्रेसने साठ वर्षे सत्तेत राहून शेतकऱ्याला न्याय देण्याचे काम न केल्याने देशात शेती व शेतकऱ्यांचे प्रश्न निर्माण झाले आहेत. शेतकऱ्याला न्याय देण्याचे काम पंतप्रधान नरेंद्र मोदी यांच्या नेतृत्वाखालील सरकार करत आहे. केंद्र व राज्य शासनाने शेतकऱ्यांच्या प्रश्नांची गंभीरपणे दखल घेतली आहे. दोन वर्षे थांबा. काळ्या आईची सेवा करणाऱ्या शेतकऱ्यांच्या जीवनात निश्चित परिवर्तन होईल, अशी ग्वाही राज्य कृषिमूल्य आयोगाचे अध्यक्ष पाशा पटेल यांनी दिले. ग्रामोन्नती मंडळ संचलित येथील कृषी विज्ञान केंद्राच्या वतीने ४ ते ७ जानेवारीदरम्यान चार दिवसांच्या ग्लोबल फार्मर्स २०१८ या कृषी प्रदर्शनाचे आयोजन करण्यात आले आहे. या प्रदर्शनाचे उद्‌घाटन गुरुवारी (ता. ४) दुपारी श्री. पटेल यांच्या हस्ते झाले. या वेळी ‘शेतमालविषयक आर्थिक धोरण व हमीभाव’ या विषयावर पटेल बोलत होते. कार्यक्रमाच्या अध्यक्षस्थानी कृषी विज्ञान केंद्राचे अध्यक्ष अनिल मेहेर होते. श्री. पटेल म्हणाले,  की पंतप्रधान नरेंद्र मोदी यांनी खाद्य तेलावर आयात शुल्क आकारण्याचा शेतकरीहिताचा धोरणात्मक निर्णय घेतला. भाजप शासनाच्या धोरणामुळे हरभरा, सोयाबीन, वाटाणा उत्पादनाला योग्य भाव मिळाला आहे. शेतीमालाला योग्य भाव मिळण्यासाठी ग्राहकाची गरज ओळखून उत्पादन घेणे आवश्‍यक असून, शेतमाल खरेदी करणाऱ्या ग्राहकांची मानसिकता बदलणे आवश्यक आहे. कांद्याच्या भावावरून शहरी ग्राहक लगेच तक्रारी करतो. त्यामुळे सरकारे कोसळतात. अशा वेळी शहरी ग्राहकांनीही शेतकऱ्यांचा विचार केला पाहिजे. शेतीला दिवसा वीजपुरवठा करण्याबाबत शेतकऱ्यांनी पाशा पटेल यांना प्रश्न विचारले. तसेच शेती मालाच्या हमीभावाविषयी बोलण्यास सांगितले. त्यावर याबाबत आपण मुख्यमंत्र्यांशी बोलून शेतकऱ्यांच्या भावना त्यांना सांगणार असल्याचे पटेल यांनी स्पष्ट केले.