अोल्या हळदीपासून एकाच दिवसात होणार पावडर

अकोला : डॉ. पंजाबराव देशमुख कृषी विद्यापीठाने विकसित केलेल्या तंत्रज्ञानाचा अधिकाधिक प्रसार होण्यासाठी गेल्या काही दिवसांपासून सामंजस्य करार करण्याचा धडाका सुरू केला अाहे. अाता हळद प्रक्रिया तंत्रज्ञान वापराबाबत विद्यापीठाने दोन कंपन्यांसोबत करार केला अाहे.  सामंजस्य करार प्रसंगी विद्यापीठाचे कुलगुरू डॉ. व्ही. एम. भाले यांच्यासह संशोधन संचालक डॉ. विलास खर्चे, कुलसचिव डॉ. प्रकाश कडू, विद्यापीठ नियंत्रक विद्या पवार, संशोधक डॉ. संजय भोयर, डॉ. प्रदीप बोरकर, सहयोगी संशोधन संचालक डॉ. अजय सदावर्ते, तांत्रिक सचिव डॉ. नीरज सातपुते, जनसंपर्क अधिकारी डॉ. किशोर बिडवे, टर्मिजर अॅग्रो प्रोसेसर कंपनी (पुणे) चे एस. एस. मोरे, एस. बी. सावंत, गोपाल ओझा व कंचनी शेतकरी उत्पादक कंपनी (वरोरा, जि. चंद्रपूर) चे अध्यक्ष यशवंत सायरे, संचालक अजय पंचभाई, आर. के. पिशे, डॉ. अनुप वासाडे, नितीन टोंगे उपस्थित होते. सामंजस्य करारावर विद्यापीठाचे वतीने डॉ. संजय भोयर यांनी तर कंपनीच्या वतीने एस. एस. मोरे व यशवंत सायरे यांनी स्वाक्षऱ्या केल्या.  या वेळी डॉ. भाले म्हणाले, की बदलत्या वातावरणाच्या पार्श्वभूमीवर सध्या शेती व्यवसायात अनेक स्थित्यंतरे होत अाहेत. अलीकडील काळात स्थापन झालेल्या शेतकरी उत्पादक कंपन्या ग्रामीण भागाचा चेहरामोहरा बदलणाऱ्या ठरतील.  पूर्व विदर्भात धान पिकाखालील क्षेत्राची उत्पादकता दिवसेगणिक स्थिरावत असून धानाला पर्यायी पिके लोकप्रिय करण्यात विभागीय कृषी संशोधन केंद्र, कृषी विज्ञान केंद्रांनी आघाडी घेतली अाहे. यामध्ये कपाशी, भाजीपाला, ऊस, हळद, अद्रक, फळपिके आदी नगदी पिकांचा समावेश अाहे. केवळ उत्पादनावर समाधानी न राहता गाव पातळीवरच प्रक्रिया करीत पक्का माल शहरात विक्रीस उपलब्ध करण्यावर विशेषतः युवा वर्गाने प्रयत्नशील राहावे. या सामंजस्य कराराच्या माध्यमातून हळदीच्या ओल्या कंदापासून वापरा योग्य हळद पावडर केवळ एका दिवसात करता येणे शक्य होणार अाहे.  सुधारीत हळद प्रक्रिया तंत्रज्ञानाचे संशोधन डॉ. संजय भोयर यांनी केले असून विद्यापीठाच्या या तंत्रज्ञानाला पेटंट मिळण्यासाठी प्रयत्नशील असल्याचे डॉ. भाले यांनी सांगितले.