सांगली : शनिवारपासून पीकविमा खात्यात जमा होणार

सांगली ः पीकविमा योजनेअंतर्गत आंबिया बहर पीकविम्यापोटी जिल्ह्याला १७ कोटी ४६ लाख ८८ हजार रुपये रक्कम आली आहे. जिल्ह्यात सात हजार ७९५ शेतकऱ्यांना या रकमेचा लाभ मिळणार असून, शनिवारी (ता. १५) पासून थेट शेतकऱ्यांच्या खात्यावर ही विम्याची रक्कम जमा केली जाणार असल्याची माहिती जिल्हा कृषी अधीक्षक राजेंद्र साबळे यांनी दिली.

जिल्ह्यातील शेतकऱ्यांनी पिकांचा विमा उतरविला असून, या विम्याच्या भरपाई पोटी शेतकऱ्यांना विमा रक्कम मंजूर झाली आहे. आंबे बहर कालावधीतील ज्या शेतकऱ्यांनी विमा भरला होता, त्या शेतकऱ्यांना पीकविमा मंजूर आहे. या योजनेत सात हजार ७९५ शेतकऱ्यांनी डाळिंब, केळी, द्राक्ष, आंबा पिकांचा समावेश आहे.

या पिकाच्या भरपाईपोटी कंपनीकडून १७ कोटी ४६ लाख ८८ हजार १९ रुपये इतकी विमा रक्कम मंजूर केली असून, ही रक्कम कृषी विभागाकडे पार्त झाली आहे. त्याचे वाटप शनिवारपासून करण्यात येणार आहे. थेट शेतकऱ्यांच्या खात्यावर ही रक्कम जमा केली जाणार आहे. 

रब्बी २०१८-१९ या वर्षातीलही पिकांचा विमा ज्या शेतकऱ्यांनी उतरविला आहे, त्याचीही भरपाई लकरच मिळणार आहे. सध्या आटपाडी तालुक्यातील दोन मंडलांतील ५२ इतकी रक्कम आली आहे. त्याचेही वाटप केले जाईल. पीकविमा ही योजना शेतकऱ्यांसाठी उपयुक्त व अडचणीच्या कालावधीत उपयोगी पडणारी आहे. जिल्ह्याला पीकविम्याच्या भरपाई रकमेने यंदा जिल्ह्यात रेकॉर्ड केले आहे. आतापर्यंत पीकविम्याच्या भरपाईपोटी शंभर कोटींवर रक्कम आली आहे. त्यामध्ये खरीप २०१८ चे ३० कोटी, डाळिंबाचे ६२ कोटी आणि आंबिया बहरातील साडेसतरा कोटी इतकी रक्कम विम्यापोटी आली आहे. आणखी २५ ते ३० कोटी इतकी रब्बीची भरपाई येण्याची शक्यता आहे.

रब्बी हंगामातील पीकविमा लवकर शेतकऱ्यांच्या खात्यावर जमा होईल. सध्या खरीप हंगामातील पीकविमा योजना सुरू आहे. शेतकऱ्यांनी याचा लाभ घ्यावा.

- राजेंद्र साबळे, जिल्हा कृषी अधीक्षक सांगली