पेट्रोल दराची शंभरीकडे वाटचाल

मुंबई : महागाईच्या आगीत होरपळणाऱ्या सर्वसामान्य नागरिकांना काही दिवसांपासून इंधन दरवाढीचे दाहक चटके सोसावे लागत आहेत. ऑगस्टच्या मध्यापासून सातत्याने इंधन दरवाढीचा पारा चढतच असून, तो रोज नवनवीन उच्चांक गाठत आहे. रविवारी मुंबईत एक लिटर पेट्रोलसाठी 89.29 रुपये तर एक लिटर डिझेलसाठी 78.26 रुपये मोजावे लागत होते. शंभरीकडे वाटचाल सुरू असलेल्या पेट्रोल दरवाढीचा नागरिकांना दाह सोसेनासा होत आहे.  इंधन दरवाढीमुळे आपसूकच मालवाहतुकीचे भाडेही वाढते. परिणामी भाजीपाला, फळे, धान्य तसेच अन्य जीवनावश्‍यक वस्तूंच्या किमतीतही वाढ होत आहे. परिणामी मासिक बजेट कोलमडत असल्याने सर्वसामान्यांमध्ये तीव्र प्रतिक्रिया उमटत आहेत. 

ऑगस्टच्या मध्यापासून आंतरराष्ट्रीय बाजारपेठेत कच्च्या तेलाच्या किमतीत होणारी वाढ, डॉलरच्या तुलनेत रुपयाची होणारी घसरण तसेच इंधन दर आंतरराष्ट्रीय बाजारपेठेशी सुसंगत केल्याने देशात पेट्रोल-डिझेलची दरवाढ होत आहे. ऑगस्टच्या मध्यापासून जवळपास प्रत्येक दिवशी इंधनाचे दर वाढत आहेत. गेल्या आठवड्यात केवळ बुधवारी या वाढीला ब्रेक लागला. त्या दिवशी दरवाढ झाली नव्हती तर वाढीला अल्पसा विराम मिळाला होता. रविवारीही पेट्रोल आणि डिझेलच्या दरात अनुक्रमे 28 आणि 19 पैशांनी वाढ झाली. रोज नवा उच्चांक गाठणाऱ्या या दरांमुळे सर्वसामान्यांमध्ये असलेल्या रोषाचा लाभ उठवण्याचा प्रयत्न विरोधक करत असतानाच भाजपचे राष्ट्रीय अध्यक्ष अमित शहा यांनी या वाढीस आंतरराष्ट्रीय घडामोडी कारणीभूत असल्याचा दावा केला. अमेरिका आणि चीनमधील व्यापारयुद्ध तसेच अमेरिका आणि तेल उत्पादक देशांमधील वाद त्यात जबाबदार असल्याचे सांगत केंद्र सरकार लवकरच हे दर कमी करण्याबाबत पावले उचलून सर्वसामान्यांना दिलासा देईल, असे आश्‍वासनही त्यांनी दिले. 

महाराष्ट्रात इंधन महाग  देशातील इतर राज्यांच्या तुलनेत महाराष्ट्रात पेट्रोल-डिझेलचे दर सर्वाधिक आहेत. त्यास इंधनावर आकारले जाणारे कर कारणीभूत आहेत. जनतेत असलेल्या रोषाची दखल घेत आंध्र प्रदेश, राज्यस्थान तसेच पश्‍चिम बंगालसारख्या राज्यांनी इंधनावरील कर कमी केले आहेत. राज्यानेही तसे केल्यास नागरिकांना दिलासा मिळू शकेल. केंद्रानेही इंधनाचे दर जीएसटीच्या कक्षेत आणल्यास पेट्रोल-डिझेलचे दर मोठ्या प्रमाणावर कमी होतील, असे जाणकारांचे मत आहे.