बोंड अळीमुळे झालेल्या नुकसानीच्या पंचनाम्याची गती संथच

औरंगाबाद : बोंड अळीमुळे झालेल्या नुकसानीच्या पंचनाम्याची गती संथच आहे. औरंगाबाद, जालना व बीड जिल्ह्यात अजूनही १ लाख १९ हजार हेक्‍टरवरील नुकसान झालेल्या क्षेत्राचे पंचनामे बाकी असल्याची माहिती सूत्रांनी दिली.

मराठवाड्यात आठही जिल्ह्यांत यंदा १६ लाख ५५ हजार हेक्‍टरवर कपाशीची लागवड झाली. त्यापैकी २३ लाखांवर शेतकऱ्यांच्या १६ लाख २७ हजार हेक्‍टरवरील पीकाला बोंड अळीचा फटका बसला. गत आठवड्यापर्यंत बाधित झालेल्या एकूण क्षेत्रापैकी साडेबावीस लाखांवर शेतकऱ्यांच्या १४ लाख ७४ हजार हेक्‍टरवरील नुकसान झालेल्या क्षेत्राचे पंचनामे पूर्ण झाले. जवळपास दीड लाख हेक्‍टरवरील नुकसान झालेल्या कपाशीच्या क्षेत्राचे पंचनामे बाकी होते.

औरंगाबाद, जालना व बीड जिल्ह्यांतील १४ लाख ५२ हजार ९७२ शेतकऱ्यांचे १० लाख ६४ हजार हेक्‍टरवरील कपाशी पिकाचे बोंड अळीमुळे नुकसान झाले होते. मागील आठवड्यापर्यंत या तीनही जिल्ह्यांतील जवळपास सव्वा लाख हेक्‍टरवरील पिकाचे पंचनामे बाकी होते. आठवडाभरात त्यापैकी जवळपास सहा ते सात हजार हेक्‍टरवरील नुकसानग्रस्त पिकाचे पंचनामे झाले. अजूनही या तीन जिल्ह्यांतील १ लाख १९ हजार हेक्‍टरवरील कपाशीचे पंचनामे बाकीच असल्याची माहिती सूत्रांनी दिली.

एकीकडे संयुक्‍त पंचनामे दुसरीकडे तक्रारीचे पंचनामे या दोन्ही पंचनाम्यांमुळे, कपाशीचे क्षेत्र जास्त असलेल्या या जिल्ह्यांमधील पंचनामे बाकी असल्याचे सूत्रांचे म्हणणे आहे. बोंड अळीमुळे झालेल्या नुकसानीप्रकरणी शासनाने सर्व विभागीय आयुक्‍तांसह जिल्हाधिकाऱ्यांना संयुक्‍त पंचनामे करण्याचे व त्याचा अहवाल दहा दिवसांत सादर करण्याचे आदेश दिले. परंतु निर्धारीत वेळेत पंचनामे झालेच नाही. त्यामुळे हे पंचनामे होणार केव्हा, त्यानंतर शासनाने जाहीर केलेली मदत मिळणार केव्हा व कशी हे दोन्ही महत्त्वाचे प्रश्‍न अनुत्तरित आहेत.