पितृपंधरवड्यामुळे सोलापुरात भेंडी, गवारला उठाव

सोलापूर ः सोलापूर कृषी उत्पन्न बाजार समितीच्या आवारात गतसप्ताहात पितृपंधरवड्यामुळे भेंडी, गवारला चांगला उठाव मिळाला. त्यांचे दरही टिकून राहिल्याचे बाजार समितीच्या सूत्रांकडून सांगण्यात आले. त्याशिवाय कोथिंबिर, मेथी, शेपूचे दरही पुन्हा वधारलेले राहिले.

बाजार समितीच्या आवारात गतसप्ताहात भेंडीची रोज १० ते २० क्विंटल, गवारची १२ ते १५ क्विंटल आवक राहिली. सध्या पितृपंधरवडा सुरू आहे. या पंधरवड्यात पूर्वजाप्रती अन्नदान करण्याची प्रथा आहे. त्यामध्ये नैवद्यासाठी खास भेंडी, गवारला महत्त्व असते. त्यामुळे गेल्या पाच-सहा दिवसांपासून त्यांचे दर वधारलेले आहेत. मुख्यतः गवार, भेंडीची आवक स्थानिक भागातूनच झाली.

गवारला प्रतिक्विंटलसाठी किमान १००० रुपये, सरासरी २५०० रुपये आणि सर्वाधिक ४००० रुपये तर भेंडीला प्रतिक्विंटल किमान ८०० रुपये, सरासरी २००० रुपये आणि सर्वाधिक ३००० रुपये असा दर मिळाला. त्याशिवाय हिरवी मिरचीलाही बऱ्यापैकी दर मिळाला. हिरव्या मिरचीची आवक जेमतेम रोज १० ते ५० क्विंटल इतकी राहिली. पण मागणीच्या तुलनेत आवक कमीच होती. हिरव्या मिरचीला प्रतिक्विंटलला किमान ७०० रुपये, सरासरी १५०० रुपये आणि सर्वाधिक २५०० रुपये असा दर मिळाला.

वांगी, ढोबळी मिरचालाही चांगली मागणी राहिली. त्यांची आवक तुलनेने कमीच होती. वांग्याला प्रतिक्विंटल किमान ८०० रुपये, सरासरी १५०० रुपये आणि सर्वाधिक २००० रुपये तर ढोबळी मिरचीला किमान ८०० रुपये, सरासरी १५०० रुपये आणि सर्वाधिक २००० रुपये असा दर मिळाला.या सप्ताहात पुन्हा भाज्यांच्या दरात किरकोळ चढ-उतार वगळता दर तेजीत राहिले.

भाज्याही स्थानिक भागातूनच आल्या. मेथी, कोथिंबिर, शेपूच्या मागणी आणि दरात सातत्य राहिले. मेथीला शंभर पेंढ्यांसाठी ४०० ते ६०० रुपये, कोथिंबिर ५०० ते ६५० रुपये आणि शेपूला २०० ते ४०० रुपये असा दर मिळाला. कांद्याच्या आवकेत काहीशी वाढ होते आहे. पण दरामध्ये अद्यापही फारशी सुधारणा झालेली दिसत नाही. कांद्याची आवक स्थानिक भागापेक्षा बाहेरील जिल्ह्यातूनच झाली. कांद्याची आवक  रोज १० ते २० गाड्यापर्यंत राहिली. कांद्याला प्रतिक्विंटलला किमान ४०० रुपये, सरासरी ७०० रुपये आणि सर्वाधिक १५०० रुपये असा दर मिळाला.