पावसाच्या अनिश्चिततेचा विचार करून रब्बीचे नियोजन करा

जालना : यंदा रब्बीचे नियोजन करताना पावसाच्या अनिश्चिततेचा विचार करूनच नियोजन करण्याचा सल्ला तज्ज्ञांनी दिला. खरपूडी कृषी विज्ञान केंद्रात शुक्रवारी (ता. ५) पार पडलेल्या २५४ व्या मासिक चर्चासत्रात हा सल्ला देण्यात आला.

लातूर येथील गळीतधान्य संशोधन केंद्राचे प्रभारी अधिकारी डॉ. एम. के. घोडके यांनी जवस लागवडीवर तर बदनापूर येथील कृषी संशोधन केंद्राचे प्रभारी अधिकारी डॉ. जे. ई. जहागिरदार यांनी हरभरा पिकाविषयी मार्गदर्शन केले.

डॉ. घोडके म्हणाले, जवसाचा मराठवाड्यासाठी विकसित केलेला लातूर-९३ हा वाण ९० दिवसांत तयार होतो. या वाणाचे कोरडवाहू परिस्थितीत एकरी ३ ते ४ क्‍विंटल तर बागायती परिस्थिती एकरी ७ ते ८ क्‍विंटल उत्पादन मिळते. ऑक्‍टोबरच्या पहिल्या पंधरवड्यात ३० बाय १० सेंटिमीटर अंतरावर पेरणी करावी. एकरी १० किलो बियाणे वापरावे. जास्त खोल पेरणी करू नये शिवाय फुलोरा अवस्थेत पाणी देण्याचे टाळावे. जवसाचा उपयोग दैनंदिन आहारात चटण्या मसाले, आदी माध्यमातून केला जातो. त्यामधील ओमेगा-३ या प्रथिनास महत्त्व असल्याचेही डॉ. घोडके म्हणाले.

डॉ. जे. ई. जहागिरदार म्हणाले, कोरडवाहू हरभऱ्याची लागवड ऑक्‍टोबरच्या पहिल्या पंधरवड्यात तर पाणी उपलब्ध असल्यास उशिरात उशिरा नोव्हेंबरपर्यंत लागवड करता येईल. हरभऱ्याची लागवड जातीपरत्वे ३० बाय १० किंवा ४५ बाय १० सेंटिमीटर अंतरावर करावी. बियाण्यास बुरशीनाशक व जिवाणू खताची प्रक्रिया करावी, शिफारशीप्रमाणे रासायनिक खते व पाण्याच्या पाळ्या द्याव्यात. घाटेअळीचे गरजेनुसार एकात्मिक पद्धतीने व्यवस्थापन करावे. हरभऱ्याच्या बीजोत्पादनाबाबतही त्यांनी मार्गदर्शन केले. सूत्रसंचालन कृषी विज्ञान केंद्राचे प्रमुख व वरिष्ठ शास्त्रज्ञ एस. व्ही. सोनुने यांनी मानले. चर्चासत्राला शेतकऱ्यांची मोठ्या संख्येने उपस्थिती होती.