पुणे जिल्ह्यात तुतीची २५५ हेक्टरवर लागवड

पुणे ः शाश्वत आणि अधिक उत्पन्न मिळविण्यासाठी पुणे जिल्ह्यातील शेतकऱ्यांचा रेशीम उद्योगाकडे कल वाढत आहे. मात्र, दरवर्षी कमी पडत असलेल्या पावसाचा फटका तुती लागवडीला बसत आहे. चालू वर्षी जिल्ह्यात तुती लागवडीचे ७०० एकराचे उद्दिष्ट ठेवले होते. त्यापैकी ४५५ शेतकऱ्यांना तुती लागवडीसाठी जिल्हा रेशीम कार्यालयाने प्रशासकीय मंजुरी दिली असून, सहा महिन्यांत पुणे जिल्ह्यात २२६ शेतकऱ्यांनी २५५ एकरावर तुती लागवड केल्याचे चित्र आहे.

गेल्या वर्षी नोव्हेंबर, डिसेंबर महिन्यात तुती लागवडीसाठी राबविण्यात आलेल्या महारेशीम अभियानाअंतर्गत ३१७ शेतकऱ्यांनी नोंदणी केली होती. जिल्ह्यात यापूर्वी जवळपासून ७०० एकरांहून अधिक क्षेत्रावर तुती लागवडी झालेल्या आहेत. गेल्या वर्षीही सुमारे १९० एकरावर तुती लागवड झाली आहे. चालू वर्षी कमी पाऊस असतानाही गेल्या वर्षीच्या तुलनेत ६५ एकराने अधिक लागवड झाली. मात्र जून, जुलै, आॅगस्ट महिन्यात अधिक पाऊस झाला असता तर या क्षेत्रात आणखी वाढ होण्याची शक्यता होती.

पुणे जिल्ह्यातील बारामती, पुरंदर, इंदापूर ही तालुके रेशीमसाठी तुतीचे हब म्हणून ओळखली जातात. यंदाही जिल्ह्यात तुती लागवडीचे सुमारे ७०० एकराचे उद्दिष्ट ठेवले होते. यंदा रेशीम कार्यालयाकडून शेतकऱ्यांना लागवडीसाठी तुती बेण्याचे नियोजन करण्यात आले; तसेच नर्सरीतील रोपे उपलब्ध करून देण्याचे नियोजन जिल्हा रेशीम कार्यालयाच्या पातळीवरून केले होते. शेतकऱ्यांनी रेशीम उद्योगाकडे वळविण्याच्या उद्देशाने मनरेगा योजनेतून तुती लागवडीसाठी प्रोत्साहन देण्यात येत आहे.

चालु वर्षी सुमारे ७०० एकराचे तुती लागवडीचे उद्दिष्ट ठेवले होते. चांगला पाऊस झाला असता तर मोठ्या प्रमाणात लागवड झाली असती. कमी पावसामुळे अडीचशे एकरावर लागवड झाली आहे. यामध्ये आणखी वाढ करण्याचा आमचा प्रयत्न आहे. - पी. एस. गणाचार्य, जिल्हा रेशीम विकास अधिकारी, पुणे