कृषी निविष्ठा विक्री मोहिमेत पोलिसांना सहभागी करणार

यवतमाळ : गेल्यावर्षीच्या खरीप हंगामातील चुकांची पुनरावृत्ती होऊ नये, याकरिता सावधगिरीच्या पावित्र्यात असलेल्या कृषी विभागाने यावर्षीच्या निविष्ठा विक्री मोहिमेत पोलिसांनाही सहभागी करून घेण्याचा निर्णय घेतला आहे. त्याकरिता लवकरच यवतमाळ जिल्ह्यात पोलिसांकरीता कार्यशाळा होणार आहे.  यवतमाळ जिल्ह्यात गेल्यावर्षीच्या खरिपात एचटी सीड मोठ्या प्रमाणावर विकल्या गेले. त्यानंतर कीडनाशकांचा बेसुमार वापर झाल्याने त्यातही अनेक शेतकऱ्यांना आपला जीव गमवावे लागला.  यवतमाळ जिल्ह्यात एकापाठोपाठ घडलेल्या या घटनांमुळे राज्यात सर्वदूर खळबळ उडाली. यावर्षीच्या खरिपात या घटनांची पुनरावृत्ती होऊ नये, याकरिता आतापासूनच कृषी विभागाकडून प्रयत्न केले जात आहेत. त्यानुसार, पहिल्या टप्प्यात पोलिसांकरिता कार्यशाळा आयोजित करण्यात येणार आहे.  विभागीय आयुक्‍त पीयूष सिंग यांनी या संदर्भाने यवतमाळ जिल्हाधिकारी डॉ. राजेश देशमुख यांना पत्र दिले आहे. पत्रानुसार, पोलिस अधिकाऱ्यांना बियाणे, खत तसेच कीडनाशक कायद्याची माहिती कार्यशाळेतून देण्याचे अभिप्रेत असल्याची माहिती सूत्रांनी दिली. कृषी विभागाच्या गुणनियंत्रण शाखेच्या अधिकाऱ्यांमार्फत पोलिसांना संबंधीत कायद्याविषयी मार्गदर्शन केले जाणार आहे.  लवकरच कार्यशाळेची तारीख निश्‍चित होणार असून, या संदर्भाने विभागीय कृषी सहसंचालक सुभाष नागरे यांनी जिल्हाधिकाऱ्यांची भेट घेत त्यांच्याशी चर्चा केली. पोलिसांना बियाणे, खत आणि कीडनाशक विषयक असलेल्या कायद्यांची माहिती कार्यशाळेतून दिली जाणार आहे. विभागीय आयुक्‍त पीयूष सिंग यांनी या कार्यशाळेसाठी पुढाकार घेतला असून लवकरच तारीख निश्‍चित करून ही कार्यशाळा घेतली जाईल. - सुभाष नागरे,  विभागीय कृषी सहसंचालक, अमरावती