निमित्त ऊस दराचे, पडघम निवडणुकांचे

सदाभाऊ खोत, राजू शेट्टी
सदाभाऊ खोत, राजू शेट्टी

कोल्हापूर : ‘नेमेची येतो मग पावसाळा’ या उक्तीप्रमाणे यंदाचाही ऊस हंगाम आता तोंडावर येऊन ठेपला आहे. प्रति वर्षाप्रमाणे यंदाही आता ऊस परिषदांची घोषणा विविध शेतकरी संघटनांनी केली आहे. उसाला पहिला हप्ता किती मिळणार, याचबरोबर आता या परिषदांमधून आता संभाव्य निवडणुकीची रणनितीही आखली जाण्याची शक्‍यता आहे. यादृष्टीनेही शेतकरी संघटनांचे कार्यकर्ते तयारीला लागले आहेत. आक्‍टोंबरच्या उत्तरार्धात या परिषदा होणार आहेत. गेल्या वर्षभरात साखरेच्या दरात जसे चढ उतार झाले तशीच परिस्थिती साखर पट्ट्यातील राजकारणावरही झाली. खासदार राजू शेट्टी यांचा एकछत्री अंमल असलेल्या स्वाभिमानी शेतकरी संघटनेने त्यांचा बुलंद आवाज म्हणून ओळखले जाणाऱ्या सदाभाऊ खोत यांच्यावर संघटनेतून बाहेर काढण्याची कारवाई केली. यानंतर श्री. शेट्टी व श्री. खोत समर्थकांत सर्वच पातळीवर युद्ध सुरू झाले. श्री. खाेत यांनी रयत क्रांती संघटनेची स्थापना करून स्वाभिमानीला आव्हान दिले. पण सरकारी धोरणाची मिळतीजुळती तत्त्वे असणाऱ्या या संघटनेने फारशी प्रभावी आंदोलने केली नाहीत. श्री. खोत यांच्याकडून सातत्याने सरकारचे गोडवे गाण्याचा प्रयत्न झाल्याने संघटनेचे स्वतंत्र अस्तित्व जाणवले नाही. उस परिषदेचा बिगूल १० ऑक्‍टोबरला कोल्हापुरातून वाजणार आहे. रघुनाथदादा पाटील यांच्या शेतकरी संघटनेच्या वतीने ही परिषद होणार आहे. २४ ऑक्‍टोबरला रयत क्रांती संघटनेची ऊस परिषद वारणा कोडोली येथे होणार आहे. २५ आक्‍टोबरला आंदोलन अंकुश या संघटनेची शेतकरी संवाद सभा शिरोळ येथे होणार आहे.  स्वाभिमानी शेतकरी संघटनेची उस परिषद २७ ऑक्‍टोबरला जयसिंगपूरला होणार आहे. रयत क्रांती संघटनेच्या ऊस परिषदेत शेट्टी विरोधकांना मानाचे स्थान असणार हे उघड आहे. श्री. खोत यांनी उसाचा दर भरघोस मिळणार असल्याने आता आंदोलनाची गरज नसल्याचे सांगून स्वाभिमानीच्या लढ्यातील हवा काढून घेण्याचा प्रयत्न केला आहे. रयतच्या परिषदेत याच प्रश्‍नावर चर्चा होण्याची शक्‍यता आहे. स्वाभिमानी शेतकरी संघटनेच्या परिषदेतही सरकारबरोबरच सदाभाऊ खोत यांच्या विरोधातही तोफा धडधडतील अशी शक्‍यता आहे. या दृष्टीने संघटनेच्या वतीने तयारी सुरू झाली आहे. येत्या काही महिन्यांत येणाऱ्या निवडणुकाच्या दृष्टीने अंदाज घेण्याचा प्रयत्नही बहुतांशी ऊस परिषदांमधून होइल, असे अंदाज व्यक्त होत आहेत. एकमेकांच्या भूमिकेला खिंडीत पकडण्याची व्यूहरचना आता प्रत्येक संघटनेकडून सुरू झाली आहे.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com