उजनी धरणातील पाणी प्रदूषितच : विद्यापीठाचे स्पष्टीकरण

सोलापूर  : उजनी धरणामुळे सोलापूर, पुणे आणि नगर जिल्ह्यांतील ५१ गावे आणि ४७ हजार कुटुंबं बाधित झाली आहेत. दुसरीकडे पुण्यातून उजनी धरणात येणाऱ्या पाण्यात मोठ्या प्रमाणावर कारखान्यांसह परिसरातील घाण येते. त्यामुळे धरणातील पाणी प्रदूषित झाले असून ते पाणी पिण्यास अपायकारकच आहे, असा निष्कर्ष सोलापूर विद्यापीठाने केलेल्या पहिल्या टप्प्यातील संशोधनातून निघाला आहे. परंतु, सोलापूर शहराला उजनीतून होणाऱ्या पाण्याशी संशोधनाचा काही संबंध नाही, असे स्पष्टीकरण विद्यापीठाकडून देण्यात आले.

सोलापूर जिल्ह्यातील शेती, जनावरे व शहरातील नागरिकांना उजनी धरणातून पाणीपुरवठा होतो. त्या पार्श्‍वभूमीवर धरण प्रदूषणमुक्‍त करण्यासाठी कुलगुरू डॉ. मृणालिनी फडणवीस यांच्या पुढाकारातून संशोधन केले जात आहे. पहिल्या टप्प्यातील संशोधनाच्या पार्श्‍वभूमीवर शहराला मिळणारे पाणी पिण्यायोग्य नसल्याचा दावाही विद्यापीठाकडून करण्यात आला होता. दरम्यान, संशोधक विद्यार्थ्यांनी महापालिका आयुक्‍त डॉ. अविनाश ढाकणे यांची भेट घेतली. त्यानंतर शहरातील पाणी पिण्यायोग्य आहे की नाही याच्याशी या संशोधनाचा काही संबंध नसल्याचा खुलासा विद्यापीठ प्रशासनाकडून करण्यात आल्याने आर्श्‍चय व्यक्‍त होत आहे.

दोन महिन्यांत पुढील संशोधन उजनी धरणातील पाणी थेट शेतीला दिल्यास उत्पादकता घटते. जनावरे अथवा नागरिकांनी ते पाणी थेट पिल्यास त्यातून आरोग्याला धोका निर्माण होऊ शकतो. त्या पार्श्‍वभूमीवर आता धरण क्षेत्रातील कुटुंबांचा सर्व्हे केला जाणार असून दोन महिन्यांत संशोधन होईल, अशी माहिती संशोधक प्रमुख प्रा. डॉ. गौतम कांबळे यांनी दिली.