कर्जमाफीसाठी पॉलिहाउस शेडनेटधारक राज्यव्यापी लढा उभारणार

संग्रहित छायाचित्र
संग्रहित छायाचित्र

नगर  : पॉलिहाउस शेडनेटधारक शेतकऱ्यांचे संपूर्ण कर्ज माफ करावे या मागणीसाठी राज्यव्यापी लढा उभारण्याचा निर्णय घेण्यात आला आहे. नगर जिल्ह्यातील अकोले तालुक्यात झालेल्या पॉलिहाउस शेडनेटधारक शेतकऱ्यांच्या सोमवारी (ता. २१) झालेल्या राज्यव्यापी बैठकीत हा निर्णय घेण्यात आला.

सरकारच्या चुकीच्या धोरणांमुळे पॉलिहाउस शेडनेटधारक शेतकरी अभूतपूर्व संकटात सापडले आहेत. कृषी विभागामार्फत तरुण शेतकऱ्यांना पॉलिहाउस व शेडनेट उभारण्यासाठी भरीस पाडून कर्जबाजारी केले गेले, मात्र नंतर वाऱ्यावर सोडून दिले गेल्याने राज्यभरातील हजारो तरुण शेतकरी कर्जाच्या विळख्यात सापडले आहेत. ऐतिहासिक शेतकरी संप व किसान सभेच्या लॉंगमार्चनंतरही या शेतकऱ्यांचे कर्ज माफ झालेले नाही. अशा शेतकऱ्यांवर लाखो रुपयांचे कर्ज असल्याने एकरकमी कर्ज परतफेड योजनेचाही लाभ हे शेतकरी घेऊ शकलेले नाहीत. अशा पार्श्वभूमीवर या शेतकऱ्यांचे संपूर्ण कर्ज माफ करण्याची मागणी करण्यात येत आहे.

संकटात सापडलेल्या या शेतकऱ्यांना संघटित करून त्यांच्या कर्जमुक्तीसाठी राज्यव्यापी लढा उभारण्याची सुरुवात २० फेब्रुवारीला नगर येथे राज्यव्यापी मेळावा घेऊन करण्यात येणार आहे. अकोले येथे झालेल्या राज्यव्यापी बैठकीत हा निर्णय घेण्यात आला. बैठकीसाठी नगर, पुणे, औरंगाबाद, सोलापूर, कोल्हापूर, नाशिकसह राज्यातील सर्वच प्रमुख जिल्ह्यांमधून प्रतिनिधी उपस्थित होते.

या प्रतिनिधींनी आंदोलन व संघटनेच्या समन्वयासाठी राज्य समन्वय समिती गठीत केली. किसान सभेचे राज्य सरचिटणीस डॉ अजित नवले यांच्यासह महेश शेटे, बाळासाहेब दरंदले, सुजाता थिटे, किरण अरगडे, अरविंद कापसे, बाळासाहेब गडाख, शिवाजी नाईक, विजय नाईक, मनोज आहेर, संजय तळेकर, प्रल्हाद बोरसे, विशाल कदम, अण्णासाहेब शिंगवन, शिवाजी तळेकर, गणेश वाघ, दिलीप डेंगळे, राजेंद्र लंगोटे आदींनी या वेळी मनोगत व्यक्त केले.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com