पुण्यात शनिवारपासून डाळिंब संघाचे अधिवेशन

सोलापूर ः अखिल महाराष्ट्र डाळिंब उत्पादक व संशोधन संघाच्या वतीने पुण्यात येत्या शनिवारी (ता. ६) आणि रविवारी (ता. ७) दोनदिवसीय वार्षिक अधिवेशन आयोजित करण्यात आले आहे. यानिमित्ताने ‘अडचणीच्या काळातील शाश्‍वत डाळिंब शेती’ या विषयावर राष्ट्रीय स्तरावरील परिसंवादाचे आयोजन करण्यात आले आहे, अशी माहिती संघाचे अध्यक्ष शहाजीराव जाचक यांनी दिली.

पुण्यातील बाजार समिती परिसरातील निसर्ग मंगल कार्यालयात शनिवारी सकाळी दहा वाजता माजी केंद्रीय कृषिमंत्री शरद पवार यांच्या हस्ते या अधिवेशनाचे उद्‍घाटन होईल. कार्यक्रमाच्या अध्यक्षस्थानी कृषिमंत्री पांडुरंग फुंडकर असतील. त्याशिवाय अन्न व नागरी पुरवठामंत्री गिरीश बापट, जैन इरिगेशन सिस्टिमचे अध्यक्ष अशोक जैन आणि ऑस्ट्रेलियाचे शास्त्रज्ञ कॅथल डेन्स हे मान्यवर उपस्थित राहणार आहेत. डाळिंब संघाबरोबर महाराष्ट्र फलोत्पादन व औषधी वनस्पती मंडळ, महाराष्ट्र राज्य कृषि पणन महामंडळ, जैन इरिगेशन सिस्टिम्स, सोलापूरचे राष्ट्रीय डाळिंब संशोधन केंद्र, राहुरीचे महात्मा फुले कृषी विद्यापीठाच्या सहकार्याने हे अधिवेशन होत आहे.  दोन दिवस चालणाऱ्या या अधिवेशनात उद्‍घाटनाच्या मुख्य सत्रानंतर राष्ट्रीय स्तरावरील परिसंवाद होणार असून, त्यात विविध तांत्रिक सत्रे होणार आहेत. सलग दोन दिवसांच्या या तांत्रिक सत्रात जमिनीचे आरोग्य व्यवस्थापन, डाळिंब विक्री व्यवस्थापनातील संधी व आव्हाने, डाळिंबासाठी अन्नद्रव्याचा वापर, निर्यात आणि प्रक्रिया उद्योग या अनुषंगाने तज्ज्ञ मार्गदर्शन करणार आहेत. या परिसंवादात सहभागासाठी संघाच्या सभासदांना ५०० रुपये शुल्क असून, अन्य शेतकऱ्यांसाठी १००० रुपये शुल्क ठेवण्यात आले आहे. अधिक माहिती आणि नोंदणीसाठी व्यवस्थापक मारुती बोराटे - ७५८८५९२८९१ यांच्याशी संपर्क साधावा, असे आवाहन करण्यात आले आहे. 

डाळिंबरत्न पुरस्कार आणि प्रदर्शन डाळिंब उत्पादक संघाच्या वतीने दरवर्षी डाळिंब उत्पादनवाढ, मार्केटिंग, प्रक्रिया, निर्यात यांसारख्या विविध क्षेत्रांत उल्लेखनीय काम करणाऱ्या शेतकऱ्यांना डाळिंबरत्न पुरस्कार देण्यात येतो. त्याशिवाय याच अनुषंगाने भरीव काम करणाऱ्या शास्त्रज्ञांचाही डाळिंबरत्न सन्मानाने गौरव करण्यात येतो. या पुरस्कारांचे वितरण पाहुण्यांच्या हस्ते या अधिवेशनात होणार आहे. त्याशिवाय डाळिंबासंबंधीचे प्रदर्शनही याठिकाणी आयोजिण्यात आले आहे, असे अध्यक्ष श्री. जाचक यांनी स्पष्ट केले आहे.