अकलूजला रविवारी डाळिंब २५० रुपये किलो !

अकलूज, जि. सोलापूर : अकलूज येथील कृषि उत्पन्न बाजार समितीमध्ये गेल्या आठवड्यापासून डाळिंबाच्या दरात तेजीचे वातावरण आहे. गेल्या दोन दिवसांपासून डाळिंबाचे दर पुन्हा टिकून राहिले आहेत. सोलापूर, सांगोला बाजारही तेजीकडे चालला आहे. रविवारी (ता.२५) एका दिवसात अकलूज बाजारात ३,६०० क्रेट डाळिंबाची आवक झाली, तर डाळिंबाला प्रतिकिलोला सर्वाधिक २५० रुपये दर मिळाला.

अकलूजच्या बाजार समितीत सहकारमहर्षी शंकरराव मोहिते-पाटील यांच्या जन्मशताब्दीचे औचित्य साधून येथे नुकताच डाळिंब बाजार सुरू केला आहे. रविवारी या बाजारात तीन हजार ६०० क्रेट डाळिंबाची आवक झाली होती. पंढरपूर, सांगोला, माळशिरस यांसह सातारा जिल्ह्यातील फलटण आणि पुणे जिल्ह्यातील इंदापूर तालुक्‍यातून शेतकरी डाळिंब विक्रीसाठी घेऊन येत आहेत. जिल्ह्यासह मुंबई, कानपूर, बिहार येथील खरेदीदार येथे आले होते. प्रतिकिलो ५० रुपयाने सुरू झालेली बोली अखेर २५० रुपयांवर गेली. तेव्हा अनेकांच्या भुवया उंचावल्या होत्या. मंगलमूर्ती फ्रूट कंपनीच्या अडतीवर मोटेवाडी येथील शेतकरी खंडू पिसे यांच्या डाळिंबाला प्रतिकिलो २०० रुपये दर मिळाला. तर महाराष्ट्र ॲग्रो ट्रेडिंग कंपनी या अडत्याकडे हरिदास कणसे (रा. गिरवी, ता. माळशिरस) यांच्या डाळिंबाला २५० रुपये दर मिळाला. या उच्चांकी भावामुळे येथील डाळिंब बाजारात उत्साहाचे वातावरण होते. सोलापूर, सांगोला बाजारातही डाळिंबाच्या दरात तेजी टिकून आहे. सोलापुरात ८० ते १०० रुपये आणि सांगोल्यातही सर्वाधिक २०० रुपयांपर्यंत दर पोचला आहे.