परभणीतील ९ तलाव कोरडे

परभणी:  पाणीसाठा संपल्याने कोरडे पडलेल्या जिल्ह्यातील तलावांची संख्या या आठवड्यामध्ये ९ झाली आहे. येलदरी, सिध्देश्वर धरणातील मृत पाणीसाठ्यामध्ये घट होत आहे. २२ पैकी ५ तलावांमध्ये केवळ ६ टक्के उपयुक्त पाणीसाठा शिल्लक राहिला आहे. पावसाळा जवळ येऊन ठेपलेला असताना जिल्ह्यातील पाणी टंचाईचे संकट अधिक गहिरे होत आहे. जिल्ह्यात टॅंकरची संख्या ३५ पर्यंत वाढली आहे.

रविवारी (ता. २७) सकाळी पैठण येथील जायकवाडी धरणात २७.९६, माजलगाव प्रकल्पात १०, निम्न दुधना प्रकल्पात १७.७५ टक्के उपयुक्त पाणीसाठा होता. पंधरवाड्यामध्ये या तीन मोठ्या धरणातील पाणीसाठ्यात अनुक्रमे ६.४९, ८.२१ आणि १०.३७ टक्क्यांनी घट झाली आहे.

येलदरी आणि सिद्धेश्वर या दोन ही धरणांतील मृत पाणीसाठ्यात घट होत आहे. करपरा मध्यम प्रकल्पात १० टक्के उपयुक्त पाणीसाठा शिल्लक असून त्यात पंधरा दिवसांंत ४ टक्क्यांनी घट झाली. २२ पैकी टाकळवाडी, देवगांव, जोगवाडा, बेलखेडा, वडाळी, चारठाणा, चिंचोली, आडगांव, दहेगांव हे नऊ तलाव कोरडे पडले आहेत.

पेडगाव, आंबेगाव, नखातवाडी, तांदुळवाडी, राणीसावरगांव, कोद्री, केहाळ, भोसी या तलावांतील उपयुक्त पाणीसाठा संपला असून तो जोत्याखाली गेला आहे. यापैकी अनेक तलाव कोरडे पडण्याच्या मार्गावर आहेत.

झरी (ता. पाथरी) येथील तलावांमध्ये जायकवाडी डाव्या कालव्याचे पाणी सोडण्यात आले. त्यामुळे या तलावात आता ८६ टक्के उपयुक्त पाणीसाठा आहे. पिंपळदरीत ४, कवडा तलावात ७, मांडवीत १, पाडाळीत २३ टक्के पाणीसाठा शिल्लक आहे.

प्रकल्प कोरडे पडत चालल्यामुळे भूजल पातळी खालावत आहे. त्यामुळे आटत चाललेल्या विहिरी, बोअरची संख्या वाढत आहे. गावे, वाड्या, वस्त्या, तांड्यावरील पाणीटंचाईची समस्या दिवसागणिक वाढत चालली आहे. पंधरवाड्यामध्ये ८ टॅंकरची भर पडल्यामुळे पाणीपुरवठा करणाऱ्या टॅंकरची संख्या ३५ पर्यंत वाढली आहे.