कोकणात पाऊस वाढण्याचा अंदाज

पुणे : पावसाला पोषक हवामान तयार होत असल्याने शुक्रवारपासून (ता. ३) कोकणात पाऊस वाढण्याचा अंदाज आहे. कोकणात तुरळक ठिकाणी मुसळधारेचा इशारा आहे, तर रविवारपर्यंत (ता. ५) उर्वरित राज्यात तुरळक ठिकाणी पाऊस पडण्याची शक्यता हवामान विभागाने वर्तविली आहे. बुधवारी (ता. १) दुपारनंतर मराठवाडा, पश्‍चिम महाराष्ट्रात ढगाळ हवामान होते.  पावसाने उघडीप दिल्यानंतर ढगाळ हवामानामुळे राज्याच्या तापमानात चढ- उतार होत आहे. विदर्भ, मराठवाड्यात कमाल तापमानाचा पारा सरासरीच्या वर सरकला असून, मंगळवारी (ता. ३१) सकाळपर्यंतच्या २४ तासांमध्ये विदर्भातील अकोला येथे राज्यातील उच्चांकी ३३.८ अंश सेल्सिअस तापमानाची नोंद झाली होती; तर कोकण, मध्य महाराष्ट्र, विदर्भात हलक्या सरींनी हजेरी लावली.  पूर्व उत्तर प्रदेश आणि परिसरावर कमी दाबाचे क्षेत्र सक्रिय असून, मॉन्सूनचा आस असलेला कमी दाबाचा पट्टा पंजाबच्या फिरोजपूरपासून बंगालच्या उपसागरापर्यंत आहे. पुढील दोन ते तीन दिवस उत्तर प्रदेश आणि बिहारमध्ये जोरदार पावसाची शक्यता आहे, तर दक्षिण भारतात हवेचे पूर्व-पश्‍चिम जोडक्षेत्र असल्याने शुक्रवारपासून (ता. ३) कोकणात पाऊस वाढणार आहे. रविवारी (ता. ५) विदर्भात काही ठिकाणी हलका पाऊस पडण्याचा अंदाज आहे.   बुधवारी (ता. १) सकाळी साडेआठ वाजेपर्यंतच्या २४ तासांमध्ये राज्यातील विविध ठिकाणचे कमाल तापमान (अंश सेल्सिअसमध्ये) : पुणे २२.४, नगर ३१.७, कोल्हापूर २५.४, महाबळेश्वर १९.६, मालेगाव ३१.०, नाशिक २८.३, सांगली २६.२, सातारा २७.१, सोलापूर ३२.१, मुंबई ३०.२, अलिबाग ३०.८, रत्नागिरी २९.३, डहाणू ३१.४, आैरंगाबाद ३०.२, परभणी ३३.६, नांदेड ३३.०, अकोला ३३.८, अमरावती ३१.०, बुलडाणा ३०.७, चंद्रपूर ३३.४, गोंदिया ३०.८, नागपूर ३२.०, वर्धा ३२.८, यवतमाळ ३०.५.