बटाटा उत्पादक दुहेरी संकटात

उदापूर, जि. पुणे : जुन्नर तालुक्‍यातील बटाटा उत्पादक शेतकरी दुहेरी संकटात सापडला आहे. परतीचा पाऊस, तसेच विविध रोगांमुळे एकरी उत्पादन कमी मिळत आहे, तर बाजारभावही कमी मिळत आहेत. त्यामुळे शेतकरी आर्थिक अडचणीत आला आहे.

वेगवेगळ्या रोगांचा प्रादुर्भाव, प्रतिकूल हवामान, धुके, पाऊस यामुळे जुन्नर तालुक्‍यात यंदा बटाटा उत्पादनात घट होण्याची शक्‍यता शेतकरी व्यक्त करीत आहेत. उत्पादन खर्चात मात्र वाढ होत आहे. त्यात मजूर टंचाई आणि वाढत्या मजुरीचा प्रश्‍नही आहेच. परतीच्या पावसामुळे बटाट्यावर करपा, दांडी करपा, काळा करपा, डावणी, भुरी, माथेसूळ अशा वेगवेगळ्या रोगांचा प्रादुर्भाव झाल्याने उत्पादनात घट झाली आहे, तर दुसरीकडे उत्पादन खर्चात वाढ झाली आहे.

दीपावलीनंतर शेतातील कामे असतात. त्यात प्रामुख्याने कांदे लागवड, कांदा रोपाची निंदणी, चाळीतील साठवणूक केलेला कांदा भरणे, बटाटा काढणी व इतर पिकांची तोडणी वगैरेची कामे एकत्र येतात, त्यामुळे शेतमजुराचा मोठा तुटवडा जाणवत असून मजुरीही वाढली आहे. ऑगस्टच्या शेवटच्या आठवड्यात किंवा सप्टेंबरच्या सुरवातीला तालुक्‍यात बटाट्याची लागवड झाली आहे.

मात्र, या वर्षी लागवडीनंतर मोठ्या प्रमाणात पाऊस झाला, त्यातच पडलेल्या विविध रोगांमुळे बटाट्याच्या गुणवत्तेत सुधारणा झालीच नाही. बटाटा चांगल्या प्रकारे पोसलाच नाही, त्यामुळे प्रतवारीनुसार बाजारभाव कमी मिळत आहे. सध्या बटाट्यास प्रतवारीनुसार चार रुपयांपासून ते दहा रुपयांपर्यंत बाजारभाव मिळत आहे. एकरी पन्नास ते साठ हजार रुपये खर्च होऊनही उत्पादन कमी निघाल्याने उत्पादकांना खर्च वजा जाता हाती काहीच शिल्लक राहत नाही.