यंत्रमागधारकांचा लाक्षणिक बंदचा इशारा

मुंबई : राज्यातील ६० टक्क्यांहून अधिक यंत्रमाग बंद पडले आहेत. वस्त्रोद्योग उद्ध्वस्त होत आहेत. यंत्रमाग क्षेत्रातील बेरोजगारी प्रचंड वाढत आहे. अशा परिस्थितीतही राज्य सरकारने जाहीर केलेले निर्णय, धोरण, मागण्या व उपाययोजना याबाबत कोणतीही अंमलबजावणी केली नसल्याचा आरोप करीत सरकारला इशारा देण्यासाठी येत्या २६ नोव्हेंबर रोजी राज्यातील सर्व यंत्रमागधारकांनी एक दिवसाचा लाक्षणिक बंदचा इशारा दिला आहे.  यंत्रमाग बंद ठेवून कामगारांसह मोर्चा, धरणे या मार्गाने प्रत्येक यंत्रमाग केंद्रामध्ये आंदोलन करतील. त्यानंतरही सरकारने ठोस निर्णय घेतला नाही तर डिसेंबरमध्ये विधानसभेवर किमान १ लाख यंत्रमागधारक व कामगारांचे ‘हल्लाबोल’ आंदोलन करण्यात येईल, असाही निर्णय मुंबई येथे झालेल्या यंत्रमागधारक संघटना राज्यस्तरीय समन्वय समितीच्या बैठकीत एकमताने घेण्यात आल्याची माहिती समन्वय समितीच्या वतीने निमंत्रक प्रताप होगाडे यांनी दिली. यंत्रमागधारकांच्या विविध मागण्यांसाठी राज्यस्तरीय "यंत्रमागधारक संघटना समन्वय समिती"ची बैठक महाराष्ट्र चेंबर ऑफ कॉमर्स, इंडस्ट्री अँड अॅग्रीकल्चरच्या मुंबई येथील कार्यालयात पार पडली. यंत्रमागधारक आणि वस्त्रोद्योग उद्योजकांच्या विविध मागण्यांसाठी या वेळी चर्चा करण्यात आली. येत्या ५ डिसेंबरपर्यंत या मागण्यांबाबत निर्णय न झाल्यास ‘विधिमंडळावर हल्लाबोल’ करण्याचा इशाराही समन्वय समितीकडून देण्यात आलेला आहे. दरम्यान २६ नोव्हेंबर रोजीच्या लाक्षणिक बंदच्या पूर्वतयारीसाठी राज्यातील भिवंडी, मालेगाव, इचलकरंजी, सोलापूर, विटा, येवला, नागपूर, कामठी, माधवनगर, वडगांव, कुरुंदवाड, तारापूर इ. सर्व यंत्रमाग केंद्रांमध्ये जाहीर सभा व मेळावे घेण्यात येणार आहेत.  या वेळी समन्वय समितीने केंद्र आणि राज्य सरकारकडे विविध मागण्या केल्या आहेत. देशांतर्गत मालापेक्षा कमी दराने परदेशातून आयात होणारे कापड, कपडे यांची आयात कमी किंवा बंद होण्यासाठी आयात कर वाढवण्यात यावा, सुताचे बाजारभाव किमान १ महिना स्थिर राहतील यासाठी अंमलबजावणी करावी, सूत बाजारमध्ये सुताची साठेबाजी आणि काळाबाजार होऊ नये यासाठी अंमलबजावणी करावी इत्यादी मागण्या केंद्र सरकारकडे करण्यात आल्याचे होगाडे यांनी सांगितले.