खानदेशात पूर्वहंगामी कापूस लागवड सुरू

जळगाव ः खानदेशात मुबलक जलसाठे किंवा कृत्रिम जलसाठे उपलब्ध असलेल्या अनेक शेतकऱ्यांनी संकेतानुसार पूर्वहंगामी कापूस लागवड १६ मे रोजीच केली आहे. १६ ते १८ मेदरम्यान लागवड केलेल्या कापूस पिकात जोमदार बीजांकुरण झाले आहे. विशेष म्हणजे मध्य प्रदेश, गुजरातमधून बियाणे आणून शेतकऱ्यांनी ही लागवड उरकून घेतली आहे.  राज्यात कापूस बियाणे वितरणासंबंधी शासकीय यंत्रणांनी गोंधळाची स्थिती निर्माण केली. सुरवातीला १ जूनपासून कापूस बियाण्याची विक्री शेतकऱ्यांना सुरू होईल, असा आदेश जारी केला होता. नंतर २५ मेपासून बियाणे विक्री करू. काळाबाजार रोखायचा आहे, गुलाबी बोंड अळी नष्ट करायची आहे, असे शासनाने म्हटले.  परंतु शेतकऱ्यांनी बियाणे वितरणासंबंधीचा विलंब लक्षात घेता मध्य प्रदेश व गुजरातमधून कापसाचे बियाणे आणले. तेथून शेतकऱ्यांनी हे बियाणे १००० ते ११०० रुपये प्रतिपाकीट या दरात आणले. काही शेतकऱ्यांनी देशी संकरित बियाणे आणले आहे. नियमानुसार तेथील विक्रेत्यांनी बिले व इतर सविस्तर मुद्दे नमूद करून शेतकऱ्यांना हे बियाणे दिले आहे. शेतकऱ्यांनी लागवड १६ मे पासून सुरू केली. लागवड जळगाव जिल्ह्यातील चोपडा, अमळनेर व यावलमधील तापी नदीकाठी, जळगाव, पाचोरा भागात गिरणा नदीकाठी आणि धुळे, शिरपूर, नंदुरबारमधील शहादा, तळोदा भागांत वेगात सुरू असल्याची माहिती मिळाली आहे.  शिंदखेडा, शिरपुरातील काही शेतकऱ्यांनी मध्य प्रदेशात कार्यरत कंपन्याकडून देशी कापूस बियाण्याची लागवड सुरू केली आहे. या शेतकऱ्यांना संबंधित कंपनी जादा दर कापूस खरेदीच्या वेळेस देणार आहे.  यामुळे केली लवकर लागवड खानदेशात १५ मे नंतर कापूस लागवडीचा प्रघात आहे. वेचणी पोळा सणाला व्हायलाच हवी, असे नियोजन शेतकरी करतात. मग लागलीच डिसेंबरमध्ये कापसाखालील क्षेत्र रिकामे करून त्या क्षेत्रात मका किंवा इतर रब्बी पिके, वेलवर्गीय पिकांची लागवड करतात. पूर्वहंगामी लागवड जूनमध्ये केली तर वेचणी लांबते. मग पुढे रब्बीचे नियोजन चुकते, असे १८ मे रोजी कापसाची लागवड करणारे जळगाव जिल्ह्यातील एका शेतकऱ्याने नाव न प्रसिद्ध करण्याच्या अटीवर सांगितले.