कोकणात बरसणार पूर्वमोसमीच्या सरी

पुणे : ‘वायू’ चक्रीवादळाच्या प्रभावामुळे कोकणात शुक्रवारी (ता. १४) सकाळपर्यंत हलक्या ते जोरदार सरींनी हजेरी लावली. तर मध्य महाराष्ट्रातही तुरळक ठिकाणी हलका पाऊस पडला. आज (ता. १५) कोकणात काही ठिकाणी सरींवर सरी बरसणार असून, उर्वरित राज्यात हलक्या पावसाचा अंदाज हवामान विभागाने वर्तविला आहे. विदर्भात बुलडाणा, ब्रह्मपुरी, चंद्रपुरात उष्ण लाट होती. चंद्रपूर येथे राज्यातील उंच्चांकी ४५.२ अंश सेल्सिअस तापमानाची नोंद झाली.    वायू वादळामुळे कोकणात गुरुवारी पावसाने जोर धरला होता. शुक्रवारी (ता. १४) सकाळपर्यंतच्या २४ तासांमध्ये कोकणातील तळा ९० मिलिमीटर, हर्णे ८०, श्रीवर्धन, मुरूड ७०, रोहा, मंडणगड ६०, म्हसळा आणि रत्नागिरी ५० मिलिमीटर पावसाची नोंद झाली. कोकणात अनेक ठिकाणी जोरदार वाऱ्यासह पावसाच्या सरी येत होत्या. मात्र चक्रीवादळ उत्तरेकडे सरकून गेल्यानंतर पाऊस ओसरला होता.  बहुतांशी भागात चांगला पाऊस झाल्यामुळे पेरण्यांना सुरवात झाली आहे.  राज्यात पूर्वमोसमी पावसाला पोषक हवामान असल्याने ढगाळ हवामान होत आहे. वाऱ्याचा वेगही वाढल्याने उन्हाचा चटका कमी झाला आहे. विदर्भात काही ठिकाणी उष्ण लाट आहे. तर उर्वरित राज्याचे तापमानाही कमी होऊ लागले आहे. विदर्भात आज (ता. १५) तुरळक ठिकाणी उष्ण लाटेचा इशारा देण्यात आला असून, दोन दिवसांत लाट ओसण्याची शक्यता वर्तविण्यात आली आहे.      शुक्रवारी (ता. १४) सकाळपर्यंतच्या २४ तासांमध्ये राज्यात विविध ठिकाणी पडलेला पाऊस (मिलिमीटरमध्ये) :  कोकण : तळा ९०, हर्णे ८०, श्रीवर्धन, मुरूड प्रत्येकी ७०, रोहा, मंडणगड प्रत्येकी ६०, म्हसळा, रत्नागिरी प्रत्यकी ५०, राजापूर, दोडामार्ग, गुहागर, वैभववाडी प्रत्येकी ४०, देवगड, सुधागडपाली, लांजा, मुलदे प्रत्येकी ३०, कनकवली, कुडाळ, मालवण, खालापूर, कुलाबा, वेंगर्ला, चिपळूण, अलिबाग, पोलादपूर, संगमेश्वर, माणगाव प्रत्येकी २०, सांताक्रूझ, सावंतवाडी, उल्हासनगर, वसई, भिरा, महाड, माथेरान, कल्याण, पेण, डहाणू, ठाणे प्रत्येकी १०. मध्य महाराष्ट्र : गगणबावडा ५०, लोणावळा ४०, महाबळेश्वर, चंदगड, पन्हाळा प्रत्येकी ३०, जावळी मेढा, राधानगरी प्रत्येकी २०, आजरा, वडगाव मावळ, शहूवाडी, भुदरगड, वेल्हे, गडहिंग्लज, कराड, शिरोळ, नाशिक प्रत्येकी १.  घाटमाथा : आंबाणे ५०, लोणावळा ४०, ठाकूरवाडी, वाणगाव, डोंगरवाडी, खोपोली प्रत्येकी ३०, शिरगाव, शिरोटा, दावडी, कायेना, ताम्हिणी प्रत्येकी २०, भिवुपरी, भिरा प्रत्येकी १०.