पावसाचा प्रत्येक थेंब जिरवा ः पंतप्रधानांचे सरपंचांना पत्र

पुणे  ः पावसाच्या पाण्याचे विविध प्रयोगांनी जास्तीत जास्त संकलन करीत, पावसाचा प्रत्येक थेंब जिरवा. अशक्यप्राय गोष्टींना शक्य करण्याचे आवाहन पंतप्रधान नरेंद्र मोदी यांनी देशातील सर्व सरपंचांना केले आहे. यासाठी मोदी यांनी सर्व सरपंचांना पत्र पाठवले असून, पावसाचे पाणी जिरवण्यासाठी करावयाच्या उपाययोजनांच्या सूचना केल्या आहेत. तर, यासाठी ग्रामसभेचे आयोजन करण्याचीदेखील सूचना केली आहे.  

पंतप्रधान नरेंद्र मोदी यांनी देशातील सर्व सरपंचांना पत्र पाठवले आहे. या पत्रात मोदी यांनी म्हटले आहे, की वर्षा ऋतूचे आगमन होत आहे. आपण भाग्यवान आहोत, की देवाने आपल्याला पावसाची देणगी दिली आहे. याचा आदर करणे आपले कर्तव्य आहे. यासाठी पाऊस सुरू झाल्यावर पावसाचे पाणी जास्तीत जास्त संकलन करण्याच्या उपाययोजना करणे आवश्‍यक आहे. यासाठी शेताची बांध बंदिस्ती, नदी -नाल्यांमध्ये बंधारे, तलावांचे खोलीकरण, सफाई, वृक्षारोपण करीत शेतामधील पाणी शेतामध्ये आणि गावातील पाणी गावांमध्येच साठले पाहिजे. आपण जर या उपाययोजना केल्या, तर फक्त शेतीमधील उत्पादन वाढणार नाही, तर पाण्याचे मोठे संकलन होऊन गावाच्या विविध कामांना त्याचा उपयोग होईल. 

माझी आग्रही विनंती आहे, की आपण ग्रामसभा बोलावून माझ्या पत्राचे सामूहिक वाचन करून, मी सांगितलेल्या जलसंधारणाच्या विविध सूचनांचा विचारविनिमय करावा. मला विश्‍वास आहे, की ग्रामीण पातळीवर आपण सर्व मिळून पावसाचा प्रत्येक थेंब साठवून उपकृत करावे. ज्याप्रमाणे आपण स्वच्छता अभियानात व्यापक सहभाग घेत चळवळ करत हे अभियान यशस्वी केले. याचप्रमाणे माझा आग्रह आहे, की पाणी या आपल्या आगामी अभियानाला जनआंदोलनाचे स्वरूप देत याला यशस्वी करण्यासाठी आपण याचे नेतृत्व करत, अशक्यप्राय गोष्टींना शक्य करावे.

दरम्यान, २० जून रोजी ग्रामसभा आयोजित करण्याच्या सूचना जिल्हाधिकारी आणि जिल्हा परिषदेच्या मुख्य कार्यकारी अधिकाऱ्यांना राज्याच्या मुख्य सचिवांकडून देण्यात आल्या आहेत.  दरम्यान, गुजरातमधील सरपंचांना गुजराथी भाषेतून पत्र पाठविण्यात आले असून, महाराष्ट्रातील सरपंचांना मात्र हिंदी भाषेतून पत्र पाठविण्यात आल्याने सरपंचांनी नाराजी व्यक्त केली आहे.