महाकाय सायलो उभारणीत अडचणी

पुणे : शेतीमाल साठवणुकीसाठी राज्यातील सर्वांत मोठे गोदाम अर्थात सायलो उभारण्यासाठी अनेक अडचणी असल्याची माहिती सूत्रांनी दिली. पुणे भागाला मध्यवर्ती ठेवत बारामती परिसरात राज्यातील पहिल्या महाकाय सायलो उभारणीसाठी चाचपणी केली जात आहे. या प्रकल्पासाठी अंदाजे ३२ कोटी रुपये खर्च अपेक्षित आहे.  सायलो उभारणी ही अतिशय खर्चिक बाब असल्यामुळे भारतीय अन्न महामंडळ व महाराष्ट्र राज्य वखार महामंडळाच्या संयुक्त प्रयत्नांतून सायलो प्रकल्प उभा करण्याचे प्रयत्न सुरू आहेत. बारामती भागात सध्या आम्हाला प्राप्त होत असलेल्या जागेत सायलोची उभारणी करणे गैरसोयीचे आहे. कारण लोहमार्गापासून प्रकल्पाची जागा दूर असून, तेथे जाण्यासाठी सध्या मालधक्का किंवा लोहमार्ग उभारणीसाठी अफाट खर्च वाढू शकतो. सायलोपेक्षाही इतर पायाभूत सुविधांवर मोठी गुंतवणूक होणार असल्यामुळे तूर्तास सायलो प्रकल्पाचा मुद्दा रेंगाळला आहे, अशी माहिती सूत्रांनी दिली. ‘भारतीय अन्न महामंडळाच्या सहकार्याशिवाय सायलो उभारणी अशक्य होती. या प्रकल्पासाठी कोट्यवधी रुपयांची गुंतवणूक अपेक्षित आहे. मात्र वखार महामंडळाला व्यापारीदृष्ट्या गुंतवणूक केल्यानंतर उत्पन्नात वाढ झाली तरच या प्रकल्पाला पुढे नेले जाणार होते. तथापि, आता पायाभूत सुविधांसाठी खर्च वाढत असल्यामुळे सरकारी धोरणाची वाट पाहणेच योग्य राहील, असेही मत सूत्रांनी व्यक्त केले. बारामतीमध्ये सायलो उभारणी सध्या शक्य वाटत नसली, तरी भविष्यात राज्यात सायलो उभे करावे लागतील.  महामंडळाने पहिल्या टप्प्यात किमान ५० टन क्षमतेचे सायलो उभारण्याचे लक्ष्य ठेवले आहे. सायलोप्रमाणेच आम्ही राज्यात नव्याने उभारल्या जाणाऱ्या ड्रायपोर्ट संकल्पनेत स्थान मिळतेय काय याचीही चाचपणी करीत आहोत. शेतीमालाच्या उत्पादनानंतर साठवणीच्या पुरेशा सुविधा नसल्यामुळे शेतकऱ्यांना आर्थिक फटका सहन करावा लागत असल्याचे आता शासनाने मान्य केले आहे. त्यामुळे साठवण प्रकल्पांमधील सरकारी गुंतवणूक भविष्यात वाढेल, असेही सूत्रांचे म्हणणे आहे.