शेतमाल विक्रीसाठी आॅनलाइन नोंदणीत सातबाराचा खोडा

सांगली ः शेतीमाल हमीभावाने खरेदीसाठी सांगली, इस्लामपूर, तासगाव बाजार समितीत ऑनलाइन नोंदणी सुरू झाली आहे. नोंदणीसाठी सातबारावर पीक पेऱ्याची नोंदणी केलेली आवश्‍यक असल्याने शेतकरी तलाठी कार्यालयात हेलपाटे मारत आहेत. ‘‘पीक उतारा जानेवारीमध्ये मिळणार आहे’’ असे उत्तर तलाठी देत आहेत. त्यामुळे आॅनलाइन नोंदणीत सातबाराचा खोडा असल्याचे चर्चा सुरू झाली आहे.  सोयाबीन, मगू, उडीदाची आवक बाजारात वाढत असतानाच दर घसरले. त्यामुळे शासनाने हमीभावाने खरेदीची प्रक्रिया सुरू केली. सांगली बाजार समितीत दोन दिवसांपूर्वी तर इस्लामपूर आणि तासगाव तालुक्‍यात बुधवारी (ता.११) पासून ऑनलाइन नोंदणी सुरू झाली. मात्र, नोंदणीसाठी सातबारा अावश्‍यक असून पिकांची नोंद असल्यासच नोंदणी केली जाणार आहे. शेतकऱ्यांनी सातबारावर पिकाची नोंद केली आहे. नोंदणी लवकर व्हावी, यासाठी शेतकरी तलाठी कार्यालयात सातबारा घेण्यासाठी जात आहेत. मात्र, तलाठी कार्यालयात गेल्यानंतर सातबारा मिळत नसल्याने शेतकऱ्यांची अडचण होत आहे. ‘‘पीक उतारा जानेवारीमध्ये मिळणार आहे’’ असे उत्तर तलाठी देत आहेत. त्यामुळे आता शेतीमाल विक्री कसा करायचा असा प्रश्‍न उपस्थित होऊ लागला आहे.  ऑनलाइन नोंदणी केल्यानंतर धान्याची हमीभावात विक्री करता येणार आहे. ‘‘नोंदणी झाल्यानंतर नाफेड विभाग प्रत्येक शेतकऱ्याशी संपर्क करून तुमचे धान्य विक्रीसाठी घेऊन या’’ असादेखील निरोप देणार आहेत. त्यामुळे लवकरात लवकर धान्याची विक्री व्हावी, अशी यासाठी शेतकरी नियोजन करू लागले आहेत.  जिल्हाधिकाऱ्यांनी लक्ष घालावे शेतकऱ्यांनी उडीद, मुगाची काढणी केलेली आहे. खरेदी केंद्र सुरू होण्याची वाट पाहत होते. खरेदी केंद्रावर ऑनलाइन नोंदणी सुरू झाली आहे. त्यात दिवाळी तोंडावर आली आहे. त्यामुळे उडीद, मूग विक्री करून दोन पैसे दिवाळीच्या खर्चासाठी होतील या आशेने शेतकरी नोंदणीसाठी पुढे येत आहेत. मात्र, सातबाराच मिळत नसल्याने शेतकरी मोठ्या अडचणीत सापडले आहेत. त्यामुळे सातबारा मिळावा यासाठी जिल्हाधिकारी यांनी लक्ष घालावे, अशी मागणी शेतकऱ्यांनी केली आहे.