सोयाबीन, मूग, उडिदाचे उत्पादन घटले

परभणी  : परभणी जिल्ह्यातील सोयाबीन, मूग, उडिद या खरीप पिकांना पावसाच्या दीर्घ खंडाचा मोठा फटका बसला आहे. २०१६ च्या तुलनेत यंदा सोयाबीनच्या हेक्टरी उत्पादनात सरासरी १ क्विंटल ८४ किलोने घट झाली आहे. मुगाच्या हेक्टरी उत्पादनात सरासरी ३ क्विंटल ८४ किलोने तर उडिदाच्या हेक्टरी उत्पादनात सरासरी १ क्विंटल ४५ किलोने घट आल्याचे पीक कापणी प्रयोगाच्या निष्कर्षावरून स्पष्ट झाले आहे.

यंदा परभणी जिल्ह्यात कृषी विभागाने सोयाबीनची हेक्टरी उत्पादकता १२ क्विंटल, मुगाची उत्पादकता हेक्टरी ६ क्विंटल ५० किलो एवढी प्रस्तावित केली होती. परंतु, पेरणीनंतर वाढीच्या तसेच परिपक्वतेच्या अवस्थेत दीड महिन्याहून अधिक काळ पावसाचा खंड पडला. त्यामुळे या पिकांच्या उत्पादकतेत गतवर्षीच्या तुलनेत यंदा मोठी घट आली आहे.

सध्या सोयाबीनची काढणी सुरू आहे. पीक कापणी प्रयोगाच्या निष्कर्षावरून यंदा सोयाबीनचे हेक्टरी सरासरी ९ क्विंटल (एकरी ३ क्विंटल ६० किलो) उत्पादन आल्याचे स्पष्ट झाले आहे. मुगाचे हेक्टरी सरासरी २ क्विंटल १६ किलो (एकरी ८६ किलो), उडिदाचे हेक्टरी सरासरी २ क्विंटल ९० किलो (एकरी १ क्विंटल १६ किलो) उत्पादन मिळाले असल्याचे स्पष्ट झाले आहे.

२०१६ -१७ च्या खरीप हंगामात सोयाबीनची सरासरी उत्पादकता हेक्टरी १० क्विंटल ८४ किलो, मुगाची हेक्टरी उत्पादकता ५ क्विंटल ९७ किलो आणि उडिदाची हेक्टरी उत्पादकता ४ क्विंटल ३५ किलो आली होती. गतवर्षीच्या तुलनेत यंदा सोयाबीनच्या उत्पादनात हेक्टरी १ क्विंटल ८४ किलोने (एकरी ७३.६ किलो), मुगाच्या उत्पादनात हेक्टरी ३ क्विंटल ८१ किलोने (एकरी १ क्विंटल ५२ किलो), उडिदाच्या उत्पादनात हेक्टरी १ क्विंटल ४५ किलोने (एकरी ५८ किलो) घट आली आहे.

२०१६ मध्ये चांगल्या पावसामुळे उत्पादकता वाढली होती. परंतु यंदा २०१७ मध्ये पावसाच्या दीर्घ खंडाचा कमी कालावधीत काढणीस येणाऱ्या सोयाबीन, मूग, उडिद या पिकांच्या उत्पादनावर परिणाम झाला आहे. उत्पादकता घटल्यामुळे शेतकऱ्यांना मोठा आर्थिक फटका बसला आहे. दरम्यान २०१४-१५ मध्ये कमी पाऊस झाल्यामुळे उत्पादकतेत मोठी घट झाली होती.

सोयाबीनची सरासरी उत्पादकता हेक्टरी ३ क्विंटल २५ किलो, मुगाची १ क्विंटल ८६ किलो, उडिदाची १ क्विंटल ७१ किलो एवढी आली होती. तर २०१५-१६ मध्ये सोयाबीनची सरासरी उत्पादकता हेक्टरी २ क्विंटल २२ किलो, मुगाची ६३ किलो, उडिदाची ५४ किलो आली होती.