मूग, उडीद खरेदीला उत्पादकता प्रमाणपत्राचा खोडा

लातूर : सध्या बाजारात शेतमालाचे भाव पडलेले आहेत. त्यामुळे मूग व उडदालाही किंमत मिळत नाही. त्यामुळे शेतकऱ्यांना कमी दराने आपला माल विकावा लागत आहे. हे लक्षात आल्यानंतर शासनाने मूग, उडदाचे खरेदी केंद्रे सुरू केली आहेत. आॅनलाइन नोंदणी केली जात आहे. यात जिल्ह्यातील दोन खरेदी केंद्रांवर अकराशे शेतकऱ्यांनी नोंदणीही केली आहे; पण कृषी विभागाने उत्पादकता दाखविल्याने अद्यापपर्यंत या दोन्ही खरेदी केंद्रांवर एक क्विंटलही खरेदी झालेली नाही. शेतकऱ्य़ांचा माल तसाच परत चालला आहे. याकडे शासनाने लक्ष देण्याची गरज निर्माण झाली आहे. 

शासनाने मुगासाठी क्विंटलला पाच हजार ५७५ रुपये; तर उडदासाठी क्विंटलला पाच हजार चारशे रुपये हमीभाव जाहीर केला आहे. सध्या बाजारात मुगासाठी क्विंटलला जास्तीचा पाच हजार ५१ रुपये; तर सरासरी चार हजार चारशे रुपये भाव आहे. 

उडदाला जास्तीचा चार हजार सहाशे; तर सरासरी तीन हजार आठशे रुपये भाव आहे. दिवसेंदिवस भाव कमी होत चालला आहे. तूर जिल्ह्यात लातूर व उदगीर येथे शासनाच्या वतीने मूग व उडदाचे खरेदी केंद्रे सुरू करण्यात आली आहेत. लातूरच्या खरेदी केंद्रावर लातूर, रेणापूर, औसा, शिरूर अनंतपाळ व निलंगा; तर उदगीरच्या खऱेदी केंद्रावर उदगीर, जळकोट, देवणी, अहमदपूर व चाकूर या तालुक्यांतील शेतकऱ्यांची मूग व उडदाची खरेदी केली जाणार आहे. याकरिता शेतकऱ्यांना आॅनलाइन नोंदणी अगोदर करणे गरजेचे आहे. 

दिवाळीपूर्वी हे खऱेदी केंद्र सुरू करण्यात आले आहे. नोंदणीची प्रक्रियाही किचकट आहे. आतापर्यंत लातूर केंद्रावर ४६०, तर उदगीर खरेदी केंद्रावर ५४० जणांनी नोंदणी केली आहे. 

या केंद्रावर मूग व उडदाची खरेदी करीत असताना कृषी विभागाच्या उत्पादकता प्रमाणपत्राचा आधार घेतला जात आहे. यात येथील कृषी विभागाने उडदासाठी ३.३० क्विंटल; तर मुगासाठी ३.५० क्विंटल उत्पादकता दाखवली आहे; पण या वर्षी जिल्ह्यात चांगला पाऊस झाल्याने शेतकऱ्याचे उत्पादनही चांगले झाले आहे; पण कृषी विभागाने कमी उत्पादकता दाखविल्याने अनेक अडचणी निर्माण होत आहेत. आतापर्यंत एकही क्विंटल खरेदी झालेली नाही. या प्रकारात शेतकऱ्य़ांना कमी भावानेच आपला माल बाजारात द्यावा लागत आहे. याकडे शासनाने लक्ष देण्याची गरज आहे.