कोल्हापुरात आठ हजार एकरांवर हुमणीचा प्रादुर्भाव

कोल्हापूर : पावसाने दिलेली दडी व प्रतिकूल हवामानामुळे हुमणीच्या क्षेत्रात वाढ झाल्याची माहिती कृषी विभागाच्या सूत्रांनी दिली. जिल्ह्यात यंदा सुमारे आठ हजार एकर क्षेत्रांवर हुमणीचा प्रादुर्भाव आढळत आहे. बहुतांशी करून उसावरील हुमणीचे प्रमाण अधिक आहे. या खालोखाल भुईमूग व अन्य पिकांवरही हुमणी किड्यांचा प्रादुर्भाव झाल्याने ही पिके संकटात असल्याचे चित्र आहे.

जिल्ह्यात यंदा सुमारे आठ हजार एकर क्षेत्रावर हुमणी आढळत आहे. गेल्या काही वर्षांत हुमणी नियंत्रणासाठी विविध प्रयत्न झाल्याने जिल्ह्यातील हुमणीचे क्षेत्र नियंत्रणात असले तरी दरवर्षी होणारा प्रादुर्भाव हा डोकेदुखी ठरल्याचे डॉ. मोहिते यांनी सांगितले. यंदापासून आम्ही कृषी विभागाच्या सहकार्याने या किडीच्या नियंत्रणासाठी योग्य औषधांचा पुरवठा करण्याबाबत नियोजन करीत आहोत.

राज्यात कोल्हापूर जिल्ह्यात हुमणी नियंत्रणासाठी चांगले प्रयत्न झाल्याने अशा धर्तीवर राज्यात सर्वत्र प्रयत्न व्हावेत, अशी अपेक्षा कृषी आयुक्तालयाने व्यक्त केल्याचे डॉ. मोहिते यांनी सांगितले. खोडवा उसासाठी आम्ही ही मोहीम जोरदारपणे राबविणार असल्याचे त्यांनी सांगितले.

कोल्हापूर कृषी महाविद्यालयाचे किटकशास्त्र विभागप्रमुख डॉ. पांडूरंग मोहिते यांनी सांगितले की कोल्हापूर, आणि सांगली आणि सातारा जिल्ह्यामध्ये बहुतांशी ठिकाणी हुमणी प्रादुर्भाव झालेला आहे. हुमणी काही ठिकाणी प्रथमच पण काही ठिकाणी दरवर्षी आढळून येते. या  भागात दोन प्रकारच्या हुमणी आढळतात. त्यात नदीकाठावर (लिकोफोलिस) आणि माळावर (होलोट्राकिया) असे संबोधले जाते. आता जी हुमणी आढळते ती माळरानाची हुमणी (होलाट्राकीया) असे नामकरण आम्ही केले आहे. आम्ही नवीन हुमणीची जात शोधून काढली आहे. त्यामध्ये भुंगे होलोट्राकिया पेक्षा लहान आहेत आणि नर भुंग्याला गेंड्यासारखे शिंग आहे. सर्वेक्षणामध्ये होलोट्राकीया ७० टक्के आणि नवीन हुमणी (फायलोग्यथस डायोनासिस) ३० टक्के असे हुमणीचे प्रमाण वारणा कारखान्याच्या परिसरात आढळून आले आहे. या हूमणीमुळे कोल्हापूर जिल्ह्यातील भात, भुईमूग आणि उभा उसाचे पिकामध्ये नुकसान झाले आहे.

सांगली भागात वारणा कारखाना परिसरात यलूर, कोरेगाव, तांदुळवाडी तसेच कागल, गडहिंग्लज, हातकलंगले, शिरोळ, आदी ठिकाणी नुकसान झाले आहे. अशा शेतकरी आणि कृषी अधिकारी यांच्या तक्रारी आल्या आहेत. या हुमणीच्या नियंत्रणासाठी तिचा जीवनक्रम, नुकसान स्वरूप आणि नियंत्रणाचे उपाय माहिती असल्याशिवाय या हुमणीचा बंदोबस्त करणे शक्‍य नाही.