हमीभावाने सोयाबीन खरेदीसाठी नाफेडला 125 केंद्रांचा प्रस्ताव

मुंबई : शेतकऱ्यांकडील सोयाबीन खरेदीसाठी पणन महामंडळाकडून 23 जिल्ह्यांत 125 ठिकाणी खरेदी केंद्र सुरू करण्याचा प्रस्ताव नाफेडकडे देण्यात आला आहे. या केंद्राच्या माध्यमातून 18 ऑक्‍टोबरपासून किमान आधारभूत किंमतीने (एमएसपी) सोयाबीनची खरेदी करण्यात येणार आहे, तर मूग आणि उडिदाची खरेदी सोमवार (ता. 16) पासून करण्यात येत आहे.

शेतकऱ्यांचे नुकसान टाळण्यासाठी पणनकडून सोयाबीन खरेदीचा प्रस्ताव नाफेडकडे पाठविण्यात आला आहे. केंद्र शासनाच्या किमान आधारभूत खरेदी योजनेंतर्गत ही केंद्र सुरू करण्याचा प्रस्ताव आहे. या केंद्रांच्या माध्यमातून राज्यातील शेतकऱ्यांकडून जवळपास 35 लाख क्विंटल सोयाबीनची खरेदी अपेक्षित आहे.

मूग आणि उडिदाच्या खरेदीसाठी गेल्या 3 ऑक्‍टोबरपासून शेतकऱ्यांची नोंदणी सुरू झाली आहे. याच केंद्रावर सोयाबीन खरेदीसाठीही नोंदणी करण्यात येणार आहे. ज्या ठिकाणी अशी केंद्रे उपलब्ध नाहीत, त्या ठिकाणी दोन दिवसांत म्हणजे 11 ऑक्‍टोबरपासून सोयाबीन खरेदीच्या नोंदणीसाठी नवीन केंद्रे सुरू करण्यात येतील.

उडीद, मुगासाठी केंद्राची मान्यता मूग आणि उडिदाची खरेदी 16 ऑक्‍टोबरपासून तर सोयाबीनची खरेदी 18 ऑक्‍टोबरपासून सुरू करण्यात येणार आहे. त्याधी राज्यात उडीद आणि मुगाचा दर हमी भावापेक्षा कमी असल्यामुळे शेतकऱ्यांचे नुकसान होऊ नये, यासाठी उडीद आणि मुगाची खरेदी केंद्रे सुरू करण्याची विनंती राज्य सरकारने केंद्र शासनाला केली होती. केंद्र सरकारने राज्याच्या प्रस्तावाला नुकतीच मान्यता दिली असल्याचे समजते.

नोंदणी करणे आवश्‍यक शेतकऱ्यांनी खरेदी केंद्रावर नोंदणी करताना सातबाराची प्रत, आधार कार्डची झेरॉक्‍स, बॅंक पासबूक झेरॉक्‍स सोबत घेऊन जवळच्या खरेदी केंद्रावर नोंदणी करावी. ही नोंदणी झालेल्या शेतकऱ्यांना हमी भावाने खरेदी केंद्र सुरू झाल्यानंतर कोणत्या दिवशी उडीद, मूग आणि सोयाबीन खरेदी केंद्रावर आणावे याची माहिती कळविण्यात येणार आहे.

पणन महासंघ आणि नाफेड यांनी खरेदी केंद्र सुरू करण्यासाठी लागणाऱ्या गोण्या, इलेक्‍ट्रॉनिक वजन काटे अशा सर्व सुविधा मुदतीआधी उपलब्ध कराव्यात, असे आदेश देण्यात आले आहेत. तोपर्यंत शेतकऱ्यांनी नोंदणी केंद्रावर स्वतःच्या शेतमालाच्या विक्रीसाठी नोंदणी करून घेण्याचे आवाहन करण्यात आले आहे.