रब्बीत ज्वारीचे १२ क्‍विंटलपर्यंत हेक्‍टरी उत्पादन प्रस्तावित

औरंगाबाद : पावसाअभावी खरीप जवळपास हातचा गेल्यात जमा असलेल्या मराठवाड्यात यंदा जवळपास १९ लाख हेक्‍टरवर रब्बीचे क्षेत्र प्रस्तावित करण्यात आले आहे. अर्थात पाऊस येण्यावरच सारे गणित अवलंबून आहे. मात्र, कृषी विभागाने केलेल्या नियोजनात यंदाच्या प्रस्तावित रब्बी क्षेत्रातून ज्वारीचे १०.३६ ते १२ क्‍विंटलपर्यंत हेक्‍टरी उत्पादन प्रस्तावित करण्यात आले आहे.

नुकत्याच पार पडलेल्या विभागीय कृषी संशोधन व सल्लागार समितीच्या बैठकीत सविस्तर माहिती  देण्यात आली. कृषीच्या औरंगाबाद, जालना व बीड या तीन जिल्ह्यांत रब्बीत प्रामुख्याने ज्वारी, गहू, मका व हरभरा आदी पिके घेतली जातात. शिवाय लातूर, उस्मानाबाद, हिंगोली, परभणी व नांदेड या पाच जिल्ह्यांंत ज्वारी, गहू, मका, हरभरा, तीळ, करडई, जवस, सूर्यफूल आदी पिके घेतली जातात.

साडेतीन लाख क्‍विंटल बियाण्यांची मागणी मराठवाड्यातील औरंगाबाद व लातूर कृषी विभागाकडून यंदाच्या रब्बी हंगामासाठी ३ लाख ५० हजार क्‍विंटल विविध प्रकारच्या बियाण्यांची मागणी नोंदविण्यात आली आहे. त्यामध्ये लातूर कृषी विभागांतर्गत पाच जिल्ह्यांसाठी २ लाख ४४ हजार क्‍विंटल तर औरंगाबाद विभागांतर्गत तीन जिल्ह्यांसाठी १ लाख ६ हजार क्‍विंटल बियाण्यांचा समावेश आहे.