हिंगोलीत १ लाख ७१ हजार हेक्टरवर रब्बी प्रस्तावित

हिंगोली ः यंदाच्या (२०१८-१९) रब्बी हंगामात हिंगोली जिल्ह्यात १ लाख ७१ हजार ८८८ हेक्टरवर रब्बीची पेरणी होईल, असा अंदाज कृषी विभागातर्फे व्यक्त करण्यात आला आहे. त्यादृष्टीने शेतकऱ्यांना कृषी निविष्ठा उपलब्ध करुन देण्यासाठी नियोजन केले जात आहे, असे कृषी विभागाच्या सूत्रांनी सांगितले.

हिंगोली जिल्ह्यात रब्बीचे सर्वसाधारण क्षेत्र १ लाख २६ हजार २९० हेक्टर आहे. यामध्ये ज्वारी २२ हजार ९७० हेक्टर, गहू ३२ हजार ५४० हेक्टर, मका ३१० हेक्टर, हरभरा ३५ हजार ३६० हेक्टर, करडई २७ हजार ९७० हेक्टर, जवस ४९० हेक्टर, सूर्यफुल ६ हजार १० हेक्टर या प्रमुख पिकांचा समावेश आहे.

गतवर्षी (२०१७) मध्ये १ लाख २५ हजार ६१४ हेक्टरवर पेरणी झाली होती.यंदाच्या (२०१८-१९) रब्बी हंगामात १ लाख ७१ हजार ८८८ हेक्टर क्षेत्रावर पेरणी प्रस्तावित करण्यात आली आहे. यामध्ये ज्वारीची १९ हजार ९७५ हेक्टर, गव्हाची ४२ हजार ८३० हेक्टर, मक्याची २ हजार ८९३ हेक्टरवर, हरभऱ्याची १ लाख १ हजार ९९७ हेक्टरवर, करडईची १ हजार ६१० हेक्टरवर, जवसाची १ हजार ८१० हेक्टरवर पेरणी होण्याची शक्यता आहे. ज्वारी आणि करडईच्या क्षेत्रात घट तर गहू आणि हरभऱ्याच्या क्षेत्रात वाढ होण्याचा अंदाज व्यक्त करण्यात आला आहे.

सोयाबीनच्या क्षेत्रात मोठी वाढ झाली आहे. सोयाबीननंतर हरभऱ्याचे पीक घेतले जाईल. त्यामुळे हरभऱ्यांच्या क्षेत्रात यंदा वाढ अपेक्षित आहे. शेतकऱ्यांना पुरेशा प्रमाणात बियाणे पुरवठा करण्यासाठी महाबीज तसेच खासगी बियाणे उत्पादक कंपन्याकडे बियाणाची मागणी करण्यात आली आहे, असे कृषी विभागाच्या सूत्रांनी सांगितले.

तालुकानिहाय संभाव्य रब्बी क्षेत्र कंसात सरासरी क्षेत्र ः हिंगोली तालुका २४ हजार ७८६ हेक्टर (१६ हजार ६९० हेक्टर), कळमनुरी तालुका ५० हजार १७८ हेक्टर (२८ हजार ९२० हेक्टर), वसमत तालुका ५९ हजार ५८३ हेक्टर (४३ हजार ५४० हेक्टर), औंढा नागनाथ तालुका १८ हजार ३८९ हेक्टर (१९ हजार ८३० हेक्टर), सेनगांव तालुका १८ हजार ७९७ हेक्टर (१७ हजार ३१० हेक्टर).