खरेदी केंद्रांच्या जाचक अटींविरोधात आंदोलन

सांगली (प्रतिनिधी) ः शासनाने कडधान्ये खरेदी करण्यासाठी खरेदी केंद्रे सुरू केली आहेत; मात्र शासनाने जाचक अटी लावल्या आहेत. यामुळे शेतकऱ्यांना हमीभावामध्ये कडधान्याची विक्री करता येत नाही. सरकारच्या या धोरणाविरोधात शरद जोशीप्रणीत शेतकरी संघटनेच्या वतीने बुधवारी (ता. २९) सांगली जिल्हाधिकारी कार्यालयासमोर आणि उपनिबंधक कार्यालय येथे उडीद उधळून आंदोलन करण्यात आले.

शासनाने कडधान्यांची खरेदी हमीभावाने करण्यास प्रारंभ केला. सुरवातीला एकरी दोनच क्विंटल खरेदी करण्याचा नियम लागू केला. त्यानंतर हेक्‍टरी सुमारे ७ ते ८ क्विंटल खरेदी करण्याचे नवीन आदेश दिले; मात्र असे असतानादेखील शेतकऱ्यांच्या कडधान्याची खरेदी केंद्रावर केली जात नाही. सरकारने कडधान्य विक्रीसाठी सातबारावर पिकांची नोंद असली पाहिजे; मात्र महसूल विभागाकडून सातबाऱ्यावर पिकाची नोंद झाली नाही. त्यामुळे कडधान्याची विक्रीच करत येत नाही. याबाबत जिल्हा उपनिबंधक (सहकार व पणन) यांना निवेदन देण्यात आले.

या निवेदानात म्हटले आहे, की शेतकऱ्यांचा शेतीमाल विक्री करताना एकरी उत्पादकाची अट घातली आहे; मात्र शेतकऱ्यांच्या पिकांची उत्पादकता ठोबळ मानाने दिली आहे. यामुळे कडधान्ये कमी भावाने बाजारात विकण्याची वेळ आली आहे. याबाबत कृषी राज्यमंत्री सदाभाऊ खोत यांच्याशी चर्चा झाली होती. तसेच  शेतकऱ्यांनी उत्पादित केलेला सर्वच शेतीमाल सरकारी खरेदी केंद्रात घेण्यात यावा; अन्यथा आंदोलन करण्याचा इशारा दिला होता.

जिल्हाधिकारी कार्यालयातील आंदोलनात शेतकरी संघटनेचे राज्य सहकार आघाडीप्रमुख संजय कोले, शीतल राजोबा, रावसाहेब दळवी यासह संघटनेचे कार्यकर्ते सहभागी झाले होते.