पशुधन संख्येनुसार चारा उपलब्ध करून द्या

परभणी ः परभणी जिल्ह्यात गेल्या काही वर्षांत पशुधन संख्येत वाढली झाली आहे. त्यामुळे चारा, वैरणीची गरजदेखील वाढली आहे. त्यामुळे पशुसंवर्धन विभागाने आधीच्या पशुगणनेनुसार पशुधनाची संख्येनुसार येत्या जूनपर्यंत चारा उपलब्ध असेल, असा जिल्हा प्रशासनास सादर केलेला अहवाल दिशाभूल करणारा आहे. दुष्काळी स्थितीमुळे चाऱ्याची उपलब्धता खूप कमी राहणार आहे. त्यामुळे येत्या जिल्ह्यातील शेतकरी, पशुपालकांना येत्या जूनपर्यंत पशुधनाचा सांभाळ करण्यासाठी निर्माण होणारा चाऱ्याचा तुटवडा भरून काढण्यासाठी नियोजन करण्यात यावे, अशी मागणी अखिल भारतीय किसान सभेतर्फे कॉम्रेड विलास बाबर यांनी केली आहे.

कृषी विद्यापीठे तसेच पशुवैद्यकीय महाविद्यालयातील तज्ज्ञांनी जनावरांची वजनानुसार प्रतिदन लागणाऱ्या चाऱ्याची गरज निश्चित केलेली आहे. त्यानुसार पशुसंवर्धन विभागाने जिल्ह्यतील पशुधनासाठी चाऱ्याचे नियोजन करणे आवश्यक आहे. चारा उपलब्धतेचे नियोजन करताना पशुसंर्वधन विभागाने २०१२ च्या पशुगणनेनुसार जिल्ह्यातील एकूण ४ लाख २४ हजार ४०४ पशुधन घटकांसाठी महिन्याला ७६ हजार ३९३ टन चाऱ्यानुसार तसेच विविध पिकांपासून उपलब्ध होणाऱ्या अपेक्षित ६ लाख ९८ हजार ३७३ टन चारा येत्या जूनपर्यंत उपलब्ध राहील, असा अहवाल सादर केलेला आहे.

जिल्ह्यातील दुष्काळी स्थितीमुळे खरीप ज्वारी, बाजरी पासून अत्यंत कमी चारा उपलब्ध झाला आहे. रब्बी ज्वारीचे क्षेत्र कमी झाले आहे. त्यामुळे येत्या जूनपर्यंत पुरेल एवढा चारा उपलब्ध होण्याची अजिबात शक्यता नाही. त्यामुळे पशुसंवर्धन विभागाने जूनपर्यंत चारा पुरेल असा जिल्हा प्रशासनास सादर केलेला अहवाल दिशाभूल करणारा आहे.

७ वर्षांमध्ये पशुधनाच्या संख्येत तीन पटीने वाढ वास्तविक पाहाता २०१२ ते २०१९ या ७ वर्षांमध्ये जिल्ह्यातील पशुधनाची संख्या तीन पटीने वाढली आहे. २०१२ मध्ये शासकीय दुग्ध योजनेअंतर्गत प्रतिदिन ११ हजार १२३ लिटर दूध संकलन होत असे. सध्या प्रतिदिन ५० हजार लिटर दूध संकलन होत आहे. यावरून पशुधनाची संख्या वाढल्याचे स्पष्ट होत आहे. पशुधनाची वाढलेली संख्या आणि तज्ज्ञांनी निश्चित केलेल्या चाऱ्याच्या गरजेनुसार २०१२ मधील पशुगणनेतील पशुधनास महिन्याला २ लाख ६१ हजार टन चारा लागेल.