जळगाव : जिल्हा परिषदेतर्फे प्रयोगशील, उपक्रमशील शेतकऱ्यांना आदर्श शेतकरी पुरस्कार देण्यासाठी दोन लाख रुपयांची तरतूद केली जाईल, तसेच या संदर्भात येत्या ११ ऑक्टोबर रोजी जिल्हा परिषदेच्या सर्वसाधारण सभेत सर्व सदस्यांना तरतुदीची तांत्रिक माहिती सादर केली जाईल, असा निर्णय प्रशासनाने घेतल्याची माहिती मिळाली आहे.
आदर्श शेतकरी पुरस्कार सुरू करण्यासाठी जिल्हा परिषदेचे उपाध्यक्ष तथा कृषी समितीचे सभापती नंदकिशोर महाजन यांनीही तरतूद करण्याची सूचना प्रशासनाला दिल्याची माहिती आहे. ‘आदर्श शेतकरी पुरस्कारासाठी तरतूद नाहीच’, या शीर्षकांतर्गत ‘अॅग्रोवन’मध्ये गुरुवारी (ता. २८) वृत्त प्रसिद्ध झाले होते. त्याची दखल कृषी विभागासह जिल्हा परिषदेच्या पदाधिकाऱ्यांनी घेतली आहे. जिल्हा परिषदेच्या स्वनिधीचे पुनर्विलोकन केले असून, त्यात दोन लाखांची तरतूद केली जाईल, अशी माहिती कृषी विकास अधिकारी मधुकर चौधरी यांनी जिल्हा परिषदेचे सदस्य नानाभाऊ महाजन यांना दिली आहे.
जिल्हा परिषद ही ग्रामस्थ, शेतकऱ्यांची आहे. त्यांचा सन्मान करण्याची परंपरा सुरू राहावी. यंदा शेतकरी सन्मान कार्यक्रम घेतला जावा, अशी सूचना कृषी समितीने प्रशासनाला केली आहे, असे कृषी समितीचे सभापती नंदकिशोर महाजन यांनी सांगितले.
येत्या महिन्यात होणाऱ्या जिल्हा परिषदेच्या सर्वसाधारण सभेमध्ये कृषी पुरस्कारांसंबंधीची माहिती सादर केली जाईल. सदस्यांना तरतूद व इतर बाबींची तांत्रिक, प्रशासनाच्या कार्यवाहीची माहिती सादर केली जाणार असल्याची माहिती मिळाली.