लासुर्णेमध्ये जिल्हा बॅंकेसमाेर शेतकऱ्यांचे घंटानाद आंदोलन

वालचंदनगर, जि. पुणे ः लासुर्णे (ता. इंदापूर) येथील पुणे जिल्हा मध्यवर्ती सहकारी बॅंकेच्या शाखेकडून इंदापूर तालुक्याच्या पश्‍चिम भागातील विविध कार्यकारी सेवा संस्थेची अडवणूक होत असल्याने शेतकऱ्यांनी बॅंकेच्या विरोधामध्ये बॅंकेसमारे घंटानाद आंदोलन करून जिल्हा बॅंकेचा निषेध केला.

इंदापूर तालुक्याच्या पश्‍चिम भागातील चार विविध कार्यकारी सेवा संस्थेची नव्याने खाती उघडून घेण्यास पुणे जिल्हा मध्यवर्ती सहकारी बॅंक २०१३ पासून टाळाटाळ करीत आहे. तसेच पश्‍चिम भागातील पाच विविध कार्यकारी सेवा संस्थेच्या सचिवाना सह्यांचे अधिकार देण्यात आले नसल्यामुळे शेतकऱ्यांना जिल्हा बॅंकेतून शून्य टक्के व्याजदराऐवजी दुसऱ्या बॅंकेतून १२ ते १३ टक्के व्याजदराने कर्ज घ्यावे लागत असून व्याजाचा भुर्दंड भरावा लागत आहेत. 

तसेच सचिवांना सह्यांचे अधिकार नसल्यामुळे कर्जवाटपचा खोळंबा होत असल्यामुळे पश्‍चिम भागातील जंक्शन, आनंदनगर, चव्हाणवाडी, परीटवाडी, उदमाईवाडी परीसरातील विविध कार्यकारी सेवा संस्थेच्या अध्यक्ष, सभासद व शेतकऱ्यांनी जंक्शनमधून लासुर्णेपर्यंत कडक उन्हामध्ये मोर्चा काढून लासुर्णेमधील जिल्हा बॅंकेसमोर घंटानाद आंदोलन करून बॅंकेचा निषेध केला. या वेळी इंदापूर तालुका कॉंग्रेस कमिटीचे तालुकाध्यक्ष अॅड. कृष्णाजी यादव यांनी सांगितले की, जिल्हा बॅंकेतील राजकारणाचा तोटा सर्वसामान्य शेतकऱ्यांना सहन करावा लागत आहे. बॅंकेचे अधिकारी राष्ट्रवादी कॉंग्रेसच्या नेत्यांचे ऐकून कॉंग्रेसच्या ताब्यातील संस्थेची अडवणूक करीत असल्याचा आरोप केला. बॅंकेतील अधिकाऱ्यांनी तातडीने विविध कार्यकारी सेवा संस्थेचा प्रश्‍न मार्गी लावण्याची मागणी लावण्याची मागणी केली.

कर्मयोगी सहकारी साखर कारखान्याचे संचालक वसंत मोहोळकर यांच्या नेतृत्वाखाली आंदोलन करण्यात आले. यामध्ये छत्रपती सहकारी साखर कारखान्याचे माजी अध्यक्ष अविनाश घोलप, पंचायत समितीचे उपसभापती देवराज जाधव, दूध संघाचे अध्यक्ष मंगेश पाटील, युवक कॉंग्रेसचे दीपक जाधव, साेमनाथ निंबाळकर, मोहन दुधाळ, सत्यशिल पाटील उपस्थित होते.