पुणे जिल्हा परिषदेच्या पशुसंवर्धन अधिकाऱ्याची होणार चौकशी

पुणे : जिल्हा परिषदेच्या पशुसंवर्धन विभागाच्या वतीने शेतकऱ्यांसाठी राबविण्यात येत असलेल्या योजनांमध्ये गोलमाल झाला आहे, असा आरोप करत भाजपचे गटनेते शरद बुट्टे-पाटील यांनी पशुसंवर्धन अधिकारी डॉ. श्रीराम पवार यांची चौकशी करण्याची मागणी जिल्हा परिषदेच्या सर्वसाधारण सभेत केली. या प्रकरणी चौकशी करून सोमवारपर्यंत अहवाल सादर करावा, असे आदेश मुख्य कार्यकारी अधिकारी सूरज मांढरे यांनी दिले आहेत. बुधवारी झालेल्या सर्वसाधारण सभेमध्ये बुट्टे पाटील यांनी पशुसंवर्धन विभागामध्ये राबविण्यात येत असलेल्या योजनांमध्ये सदस्यांना विश्वासात घेतले जात नाही, शेतकऱ्यांचे हित पाहिले जात नाही. तसेच कामधेनू योजनेचा निधी हडपण्याचा प्रकार झाला असल्याचा आरोप केला. जिल्हा परिषदेच्या वतीने खरेदी केलेल्या जनावरांसाठी सोनोग्राफी मशिन धूळ खात पडल्या असून, त्यांचा वापर होत नाही. त्यामुळे लाखो रुपये खर्चून घेतलेल्या मशिन बंद अवस्थेत आहे़त, त्यामुळे जिल्हा परिषदेचे आणि पर्यायाने शेतकऱ्यांचेही नुकसान होत आहे. यास पशुसंवर्धन अधिकारी डॉ. पवार जबाबदार असल्याचे बुट्टे-पाटील यांनी सभागृहात सांगितले.  जिल्हा परिषद सदस्य अभिजित तांबिले यांनीही सोनोग्राफी मशिन बंद असून, शेतकऱ्यांची गैरसोय होत असल्याचे सभागृहाच्या निदर्शनास आणून दिले. शिवसेनेच्या गटनेत्या आशा बुचके आणि राष्ट्रवादी कॉंग्रेसचे रणजित शिवतारे यांनी यांनी डॉ. पवार यांचा पदभार काढून घेण्याची मागणी केली. जिल्हा परिषदेचे अध्यक्ष विश्वासराव देवकाते यांनी सांगितले, की पवार यांचा पदभार काढून घ्यावा. अतिरिक्त मुख्य कार्यकारी अधिकारी एन. पी. मित्रगोत्री यांनी चौकशी करून अहवाल सादर करावा असे सांगितले. त्यावर मुख्य कार्यकारी अधिकारी सूरज मांढरे म्हणाले, की सदस्यांनी केलेल्या तक्रारी आणि समस्या लक्षात घेता जिल्हा परिषदेची बदनामी होईल असे चित्र आहे. त्यामुळे प्रथम याबाबतची चौकशी करू, दोषी आढळल्यास अधिकाऱ्यावर कडक कारवाई केली जाईल, असे आश्वासनही मांढरे यांनी दिले.