पंजाबमध्ये उसाच्या ‘सॅप’मध्ये क्विंटलमागे १० रुपयांनी वाढ

चंडीगड, पंजाब : अमरिंदर सरकारने सोमवारी (ता. २७) उसाच्या राज्य निर्धारित मूल्यात (सॅप) क्विंटलमागे १० रुपयांनी वाढ करण्याचा निर्णय घेतला आहे. शेतकऱ्यांकडून वारंवार होणारी मागणी आणि आंदोलनांच्या पार्श्वभूमीवर हा निर्णय घेण्यात आल्याची माहिती सूत्रांनी दिली.

दोआबा, माळवा आणि माझा परिसरांतील ऊस उत्पादकांनी उसाच्या दरात वाढ करावी; अन्यथा विधिमंडळाला घेराव घालण्यात येईल, असे सरकारला बजावले होते. यामुळे सरकारला तातडीने उसाच्या राज्य निर्धारित मूल्यात वाढ करण्याचा निर्णय घ्यावा लागला आहे. याविषयी विरोधी पक्षांनीही विधिमंडळात राज्य सरकारला विरोध करण्याचे मनसुबे जाहीर केले होते.

सूत्रांनी दिलेल्या माहितीनुसार राज्यातील १६ साखर कारख्यांना ६७५ लाख क्विंटल ऊस उपलब्ध होणार आहे. राज्यात ९ सहकारी तर ७ खासगी साखर कारखाने आहेत. ऊस उत्पादकांची मागणी, आंदोलनांची शक्यता आणि विरोधी पक्षांनी राज्य सरकारला विधिमंडळात घेरण्याची तयारी, याचा विचार करून राज्य मंत्रिमंडळाने एकमताने सॅप वाढविण्याचा निर्णय घेतला आहे. या वेळी झालेल्या बैठकीत विविध ऊस उत्पादक संघांचे प्रतिनिधीही उपस्थित होते.

पंजाबमध्ये कॉँग्रेसचे सरकार सत्तेवर आल्यानंतर शेतकरी कर्जमाफीचा निर्णय घेण्यात आला होता. त्यांनतर आता राज्य निर्धारित मूल्यात वाढ करण्याचा निर्णय घेण्यात आला आहे. यासाठी सरकारला २० कोटी रुपयांची अतिरिक्त तरतूद करावी लागणार आहे. असे असले तरी हरियानातील सॅप हा पंजाबपेक्षा जास्त आहे. हरियानात लवकर येणाऱ्या उसाला ३३० रुपये, मध्यम प्रकाराला ३२० तर उशिरा येणाऱ्या उसाला प्रतिक्लिंटल ३१० रुपये राज्य निर्धारित मूल्य आहे.