पशुसंवर्धन सचिवपदी पुरुषोत्तम भापकर

मुंबई : औरंगाबादचे विभागीय आयुक्‍त पुरुषोत्तम भापकर यांची वर्षभरातच पशुसंवर्धन, दुग्धविकास, मत्स्यविकास विभागांत सचिवपदी नियुक्‍ती करण्यात आली आहे. त्यांच्यासोबतच सरकारने बारा सनदी अधिकाऱ्यांच्या बदल्यांचे आदेश शनिवारी काढले. भापकरांनी पूर्वी औरंगाबाद महापालिकेत आयुक्‍त म्हणून काम केले होते. वर्षभरापूर्वी त्यांनी विभागीय आयुक्‍तपदाची सूत्रे हाती घेतली होती. त्यानंतर विभागात प्रभावीपणे काम करण्याचा प्रयत्न केला होता. मात्र महिनाभरापूर्वी त्यांच्यावर भ्रष्टाचाराचे गंभीर आरोप झाले. भापकर यांनी देवेंद्र कटके आणि विश्‍वंभर गावंडे या दोन उपजिल्हाधिकाऱ्यांचे निलंबन केले होते. मात्र त्यांचा हा निर्णय अमान्य करत कटके यांनी एक कोटीची लाच मागितल्याचा आरोप भापकरांवर केला होता. कारवाईच्या विरोधात ते उच्च न्यायालयात गेले होते, मात्र राज्य शासन भापकरांच्या निर्णयाबरोबर ठाम राहिले. कटके यांनी भापकर यांच्या विरोधात ॲट्रॉसिटीची तक्रार पोलिसांत दिली आहे. हा एकूण विषय वादग्रस्त झाल्याने राज्य सरकारने त्यांची अखेर बदली केल्याची चर्चा आहे. शेतकरी कर्जमाफीतील गोंधळावरून आयटी विभाग टीकेचा धनी ठरल्याने या विभागाचे सचिव व्ही. के. गौतम यांची बदली वित्त विभागात करण्यात आली होती. त्यास काही महिन्यांचा अवधी लोटत नाही. तोच गौतम यांची पुन्हा दुसऱ्यांदा बदली करत त्यांची नियुक्ती पर्यटन व सांस्कृतिक खात्याच्या प्रधान सचिवपदी राज्य सरकारने केली आहे. याशिवाय के. एच. कुलकर्णी यांची अमरावती जिल्हा परिषदेच्या मुख्य कार्यकारी अधिकारी पदावरून आदिवासी विभागाच्या संशोधन व प्रशिक्षण विभागाच्या आयुक्तपदी बदली करण्यात आली. तर नुकतेच महाराष्ट्र वस्तू व सेवाकर विभागात सहआयुक्तपदी नियुक्ती करण्यात आलेले सनदी अधिकारी माणिक गुरसाळ यांची तेथून बदली करत शैक्षणिक शुल्क प्राधिकरणाच्या सचिवपदी करण्यात आली. ए. ए. गुल्हाने यांची औद्यौगिक विकास महामंडळावरून बदली करत वर्धा जिल्हा परिषदेच्या मुख्य कार्यकारी अधिकारीपदी नियुक्ती करण्यात आली. श्रीमती के. मंजूलक्ष्मी यांची नियुक्ती सिंधुदुर्ग जिल्हा परिषदेच्या मुख्य कार्यकारी अधिकारीपदी करण्यात आली. तर नीमा अरोरा यांची नंदुरबार येथील आयटीडीपी प्रकल्प अधिकारी पदावरून जालन्याच्या जिल्हा परिषदेच्या मुख्य कार्यकारी अधिकारीपदी करण्यात आली. बी. पी. पृथ्वीराज यांचीही भंडारा येथील आयटीडीपी प्रकल्प अधिकारी पदावरून परभणी जिल्हा परिषदेच्या मुख्य कार्यकारी अधिकारीपदी नियुक्ती करण्यात आली. तर अमोल येडगे यांचीही नाशिकच्या आयटीडीपी प्रकल्प अधिकारी पदावरून बीड जिल्हा परिषदेच्या मुख्य कार्यकारी अधिकारी पदावर करण्यात आली. याशिवाय मनीषा खत्री यांची अमरावती जिल्हा परिषदेच्या मुख्य कार्यकारी अधिकारीपदी नियुक्ती करण्यात आली. याशिवाय सचिन ओंबासे यांना आहेरीतून गडचिरोलीच्या आयटीडीपी प्रकल्प अधिकारी पदावर नियुक्त करण्यात आले.