बुलडाणा ः कमी पावसासह विविध कारणांमुळे जिल्ह्यात यंदा रब्बी हंगाम रखडला अाहे. प्रामुख्याने गव्हाचे लागवड क्षेत्र मोठ्या प्रमाणावर घटले अाहे. दुसरीकडे हरभरा पिकाची लागवड वाढली अाहे. खरिपात बसलेली झळ रब्बी उत्पादनाच्या माध्यमातून भरून काढण्यासाठी या हंगामाकडे अाशेने बघितले जात अाहे.
बुलडाणा जिल्ह्यात अाॅक्टोबरपासून रब्बी हंगामाला सुरवात झाली होती. अाता पेरण्या अंतिम टप्प्यात पोचल्या अाहेत. या वर्षी अातापर्यंत झालेल्या पेरणीचा अंदाज घेता ८९ टक्के क्षेत्रावर रब्बी पिकांचा पेरा झाला आहे.
त्यात सर्वाधिक ९१ हजार १३६ हेक्टर क्षेत्र हरभऱ्याचे अाहे. जिल्ह्याचे हरभरा पिकाखाली सरासरी क्षेत्र प्रत्यक्षात ७३ हजार ९१० हेक्टर असताना, या वेळी पेरणी वाढून १२३ टक्क्यांपर्यंत आताच पोचली अाहे. यात अाणखी वाढ होण्याची शक्यता अाहे. जिल्ह्यात दुसरे महत्त्वाचे पीक गव्हाचे समजले जाते. रब्बीत या पिकाचे ५२ हजार ९४० हेक्टर सरासरी क्षेत्र अाहे. या वर्षी गव्हाचे लागवड क्षेत्र मोठ्या प्रमाणात घसरले अाहे. केवळ १५ हजार ५०० हेक्टरवर गव्हाची पेरणी झाली. सरासरीच्या केवळ २९ टक्के एवढेच हे क्षेत्र अाहे.
पाण्याची पातळी खालावणे, दरवर्षी उत्पादकता घटणे, उत्पादन खर्चात झालेली वाढ अादी कारणांमुळे शेतकरी गव्हाकडे पाठ फिरवून हरभऱ्यासारख्या पिकाकडे वळाले अाहेत. जिल्ह्यात दरवर्षी रब्बी ज्वारीचे क्षेत्र बऱ्यापैकी टिकून राहलेले अाहे. या वर्षीही ज्वारीची लागवड नऊ हजार हेक्टरवर पोचले अाहे. प्रत्यक्षात ९४१२ हेक्टरवर पेरणी झाली अाहे. मक्याचीही तीन हजार हेक्टरपर्यंत पेरणी झाली अाहे.
या वर्षात बुलडाणा जिल्ह्यात कमी पाऊस झाल्याने प्रकल्प भरू शकलेले नाहीत. परिणामी पाणीपातळीतसुद्धा घट अालेली अाहे. प्रकल्पांमध्ये असलेले पाणी पिण्यासाठी अारक्षित ठेवण्यात अाले असून, सिंचनासाठी पाणीउपशावर प्रशासनाने निर्बंध घातले अाहेत.
रब्बीची लागवड सुरू झाली त्या काळात जमिनीतील अोल घटत होती. या सर्वच बाबींचा लागवडीला फटका बसला. अातापर्यंत एक लाख १९ हजार १६४ हेक्टरवर पेरणी अाटोपली अाहे. सरासरीच्या ८९ टक्के हे क्षेत्र अाहे.
पिकनिहाय पेरणीक्षेत्र (हेक्टर) ः ज्वारी ९४१२, मका २९८३, गहू १५,५००, हरभरा ९१, १३६, सूर्यफूल १०, करडई १०३.
