सांगली जिल्ह्यात रब्बीची ४४ टक्के पेरणी

सांगली जिल्ह्यात रब्बी पेरणी सुरु
सांगली जिल्ह्यात रब्बी पेरणी सुरु
सांगली : जिल्ह्यात रब्बी पेरणीला वेग आला असून आत्तापर्यंत ४४ टक्के पेरणी झाली आहे. जत तालुक्‍यात ज्वारीची सर्वाधिक पेरणी झाली आहे. मात्र, तेलवर्गीय करडई, सूर्यफूल या पिकांच्या क्षेत्रात घट होण्याची शक्‍यता आहे, अशी माहिती कृषी विभागाच्या सूत्रांनी दिली.
 
जिल्ह्यात रब्बी हंगामातील सरासरी क्षेत्र २ लाख ६६ हजार ९०७ हेक्‍टर आहे. त्यापैकी आजअखेर १ लाख १७ हजार ९६० हेक्‍टरवर रब्बीचा पेरा झाला आहे. गेल्या महिन्यात पावसाने हजेरी लावल्याने खरीप हंगामातील पिकांची काढणी उशिरा सुरू झाली. यामुळे रब्बीच्या पेरण्यादेखील उशिरा प्रारंभ झाला. वाळवा, पलूस तालुक्‍यात सोयाबीनची काढणी सुरू आहे. शिराळा तालुक्‍यात भाताची अद्यापही काढणी सुरू झालेली नाही. त्यामुळे या तिन्ही तालुक्‍यांतील शेतकऱ्यांनी रब्बी हंगामातील पिकांच्या पेरणीला सुरवात केली नसल्याचे चित्र आहे. येत्या चार दिवसांत उर्वरित सोयाबीनची काढणी पूर्ण होईल त्यानंतर रब्बी पिकांच्या पेरणीला अधिक गती येईल. 
 
जत तालुक्‍यात खरीप हंगाम वाया गेला होता. यामुळे शेतकऱ्यांनी रब्बी हंगामातील पेरणीसाठी तयारी करून ठेवली होती. शेतकरी परतीच्या पावसाची प्रतीक्षा करीत होते. यामुळे गेल्या महिन्यात झालेल्या पावसावर जत तालुक्‍यातील शेतकऱ्यांनी रब्बीच्या पेरण्या केल्या. जत तालुक्‍यात ज्वारीचे क्षेत्र ८८ हजार ९४० हेक्‍टर आहे, त्यापैकी ५३ हजार ३७१ हेक्‍टरवर पेरणी झाली आहे. 

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com