रब्बी पेरणी दीड टक्क्याने माघारली

नवी दिल्ली  ः देशात यंदा रब्बी हंगामातील पेरणी मागील वर्षाच्या तुलनेत दीड टक्क्याने माघारली आहे. गेल्या वर्षी रबी पेरणी ६४.१७ दशलक्ष हेक्टरवर झाली होती. त्यातुलनेत यंदा आतापर्यंत ६३.२३ दशलक्ष हेटक्टरवर रब्बीचा पेरा झाला आहे, अशी माहिती कृषी विभागाने प्रसिद्ध केलेल्या आकडेवारीरून मिळाली. यंदा देशातील बऱ्याच भागात सरासरीपेक्षा कमी पाऊस झाला आहे. त्यातच खरिपातील पिकांची उशिरा काढणी झाली आणि जमिनीतील ओलावा नष्ट झाल्याने अनेक ठिकाणी रब्बी पेरणी करणे शक्य झाले नाही. त्यामुळे रब्बी पेरणी यंदा माघारली आहे. तसे पाहिल्यास रब्बी पेरणीवर मॉन्सूचा थेट परिणाम होत नाही; परंतु जमिनीत ओलावा असेल, तरच पेरणी करणे शक्य होते. कृषी विभागाने प्रसिद्ध केलेल्या आकडेवारीवरून गव्हाची पेरणी ५.४ टक्क्यांनी कमी होऊन ३०.०७ दशलक्ष हेक्टर आली आहे. मागील हंगामात गव्हापेक्षा हरभरा पिकांच्या दरात सातत्य राहिल्याने शेतकरी यंदा हरभरा पिकाकडे वळले आहेत. हरभऱ्याची पेरणी यंदा ८.३ टक्क्यांनी वाढून १०.७ दशलक्ष हेक्टरवर झाली आहे.  कडधान्य लागवडीखालील क्षेत्रात यंदा ५.३ टक्क्यांनी वाढ होऊन १६.६ दशलक्ष हेक्टर झाले आहे. तसेच मोहरी पिकाच्या पेरणीत ७.१ टक्के घट होऊन ६.६८ दशलक्ष हेक्टर झाली आहे. राजस्थानमध्ये यंदा झालेल्या कमी पावसाने मोहरी पिकाखालील क्षेत्र घटले आहे.    

देशातील यंदा आणि मागील वर्षातील पीकनिहाय पेरणी (दशलक्ष हेक्टरमध्ये)