खानापूर तालुक्‍यात रब्बी पिके वाळू लागली

सांगली ः आम्हाला पाणी मिळालं तरच पिकं जगतील...तरच आमचं पोट भरंल...पाण्याविना पिकं वाळून गेली आहेत...आमचं आर्थिक नुकसान झालं आहे, अशी व्यथा खानापूर तालुक्‍यातील शेतकरी मांडत होते. टेंभू उपसा सिंचन योजना सुरू झाली असली तरी खानापूर तालुक्‍यातील काहीच भागाला पाणी मिळते; पण उर्वरित भागाला पाणी मिळतच नाही. त्यामुळे रब्बी हंगामातील पिके वाळू लागली आहेत. खानापूर तालुका हा घाटमाथ्यावर वसला आहे. खानापूर तालुक्‍यात यंदा अपेक्षेपेक्षा पाऊस झाला. त्यामुळे या भागातील शेतकऱ्यांनी झालेल्या पावसावर रब्बी हंगामातील पिकांची पेरणी केली. त्यानंतर परतीच्या पावसाची वाट पाहत होता. परतीचा पाऊसदेखील कमीच झाला. त्यामुळे रब्बी ज्वारी पिकांची अपेक्षित वाढ झाली नाही. पाणी कमी पडू लागल्याने पिके वाळू लागली आहेत. टेंभू उपसा सिंचन योजनेअंतर्गत तालुक्‍यातील १८ हजार ९७५ हेक्‍टर क्षेत्राला पाणी दिले जाते, असा अहवाल संबंधित विभागाकडे आहे; मात्र वास्तविकपणे केवळ पन्नास टक्‍क्‍यांहून कमी क्षेत्राला पाणी मिळते आहे. खानापूर तालुक्‍यातील उर्वरित भागाला सहा महिन्यांनंतर पाणी देण्याचे नियोजन केले आहे. त्यासाठी निधीही आला आहे. गेल्या अनेक वर्षांपासून या भागातील शेतकरी पाण्याची मागणी करत आहेत; परंतु टेंभू योजनेचे पाणी अद्यापही मिळालेले नाही. द्राक्ष बागांना टँकरद्वारे पाणी खानापूर तालुक्‍यात निर्यातक्षम द्राक्षाचे क्षेत्र मोठ्या प्रमाणात आहे. दरवर्षी पाणीटंचाई भासते. प्रत्येक वेळी पाणी येईल अशी वाट पाहिली जाते; परंतु पाणी शेतापर्यंत आलेच नाही. पाण्याची कमतरता पडत असल्याने या भागातील द्राक्ष उत्पादक शेतकरी द्राक्ष पिकाला टँकरद्वारे पाणीपुरवठा केला जातो; मात्र पाणी मिळवण्यासाठी आटपाडी तालुक्‍यातील नेलकरंजी येथील टेंभू सिंचन योजनेच्या कालव्यातून आणावे लागते. त्यामुळे टेंभू योजनेचे पाणी पळशी, हिवरे, जरंडी यासह अन्य गावात टेंभू योजनेचे पाणी द्या, अशी मागणी शेतकरी करू लागले आहेत.