औरंगाबाद : मराठवाड्यातील औरंगाबाद, जालना व बीड जिल्ह्यांतील सर्वसाधारण ६ लाख ५२ हजार ५५ हेक्‍टरच्या तुलनेत ५ लाख ७५ हजार ९७६ हेक्‍टरवर रब्बीची पेरणी झाली आहे.
औरंगाबाद, जालना व बीड जिल्ह्यांत यंदा सर्वसाधारण १ लाख १७ हजार ४२८ हेक्‍टवर हरभऱ्याची पेरणी अपेक्षित होती. त्या तुलनेत तीनही जिल्ह्यांत १ लाख ९५ हजार ४७ हेक्‍टरवर रब्बीची पेरणी झाली आहे.
दुसरीकडे यंदा तीनही जिल्ह्यांत ३ लाख ९२ हजार ९६९ हेक्‍टरवर रब्बी ज्वारीची पेरणी अपेक्षित होती. त्या तुलनेत केवळ ६९ टक्‍के क्षेत्रावर, अर्थात २ लाख ७२ हजार ९९३ हेक्‍टरवर रब्बी ज्वारीची पेरणी झाली. तीनही जिल्ह्यांत गव्हाची १ लाख ९ हजार ७५८ हेक्‍टरवर पेरणी अपेक्षित आहे.
डिसेंबरच्या पहिल्या आठवड्याअखेर सर्वसाधारण क्षेत्राच्या ८० टक्‍के क्षेत्रावर, अर्थात ८८ हजार ६६० हेक्‍टरवरच गव्हाची पेरणी झाली आहे. तीनही जिल्ह्यांत मक्‍याची पेरणी सर्वसाधारण क्षेत्राच्या पुढे जाऊन झाली आहे. यंदा या जिल्ह्यांमध्ये १२ हजार ४६३ हेक्‍टरवर मकाची पेरणी अपेक्षित असताना १५ हजार ३७६ हेक्‍टरवर मकाची पेरणी झाली आहे.
आठ तालुक्‍यांत ज्वारीची पेरणी अधिक औरंगाबाद, जालना व बीड जिल्ह्यांतील आठ तालुक्‍यांत ज्वारीची सर्वसाधारण क्षेत्राच्या पुढे जाऊन पेरणी झाली आहे. सर्वसाधारण क्षेत्राच्या पुढे जाऊन पेरणी झालेल्या तालुक्‍यांमध्ये कन्नड, सोयगाव, जालना, अंबाजोगाई, केज, परळी, धारूर, वडवणी या तालुक्‍यांचा समावेश आहे. या सर्व तालुक्‍यांमध्ये सर्वाधिक रब्बी ज्वारीची पेरणी जालना तालुक्‍यात १८५३० हेक्‍टरवर झाली आहे. बीड जिल्ह्यातील पाटोदा तालुक्‍यात २८ हजार ६३० हेक्‍टरच्या तुलनेत २८४५० हेक्‍टरवर पेरणी झाली आहे. तर रब्बी ज्वारीचे सर्वसाधारण क्षेत्र ५६,७१० सर्वाधिक असलेल्या आष्टी तालुक्‍यात ४३,३८९ हेक्‍टरवर रब्बी ज्वारीची पेरणी झाली आहे.
दहा तालुक्‍यांत सर्वधारण क्षेत्राच्या पुढे जाऊन पेरणी औरंगाबाद, जालना व बीड जिल्ह्यांतील दहा तालुक्‍यांत यंदा आजवर सर्वसाधारण क्षेत्राच्या पुढे जाऊन पेरणी झाली आहे. यामध्ये जालना जिल्ह्यातील भोकरदन, जालना, बदनापूर, मंठा, तर बीड जिल्ह्यातील आष्टी, अंबाजोगाई, केज, परळी, धारूर, वडवणी तालुक्‍यांचा समावेश आहे. अंबाजोगाई तालुक्‍यात सर्वसाधारण क्षेत्राच्या तुलनेत अडीच पट क्षेत्रावर पेरणी झाली आहे.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.