सांगली जिल्ह्यात रब्बी पेरणी क्षेत्रात दहा हजार हेक्‍टरने घट

सांगली ः जिल्ह्यातील रब्बी हंगामातील पेरणी पूर्ण झाली आहे. गेल्या वर्षी रब्बी हंगामात जिल्ह्यात २ लाख २१ हजार ८०६ हेक्‍टरवर पेरणी झाली होती. यंदा परतीच्या पावसाने रब्बी हंगामातील पिकांच्या पेरणी क्षेत्रात वाढ होईल, असा अंदाज व्यक्त होत होता. यंदाच्या या हंगामात २ लाख ११ हजार ३३२ हेक्‍टरवर रब्बीचा पेरा झाला आहे. गतवर्षीपेक्षा यंदा रब्बी हंगामातील पेरणी क्षेत्रात १० हजार ४७४ हेक्‍टरने घट झाली आहे; मात्र जत तालुक्‍यात गेल्या वर्षीपेक्षा यंदा गव्हाचे क्षेत्र २५५६ हेक्‍टरने वाढले आहे, अशी माहिती कृषी विभागाच्या सूत्रांनी दिली.

 

जिल्ह्यात रब्बी हंगामाचे सरासरी क्षेत्र २ लाख ६६ हजार ९०७ हेक्‍टर आहे. त्यापैकी २ लाख ११ हजार ३३२ हेक्‍टरवर रब्बीचा पेरा झाला. जिल्ह्यात परतीच्या पावसामुळे रब्बी हंगामातील क्षेत्रात वाढ होईल, असा अंदाज कृषी विभागाने व्यक्त केला होता; मात्र जिल्ह्यातील १० हजार ४७४ हेक्‍टरने क्षेत्र कमी झाले असले तरी हरभरा पिकाच्या क्षेत्रात वाढ झाली आहे.

 

गहू, मका पिकांच्या क्षेत्रात वाढ झालेली दिसत नाही. रब्बी ज्वारीची पेरणी १ लाख ३७ हजार ९९८ हेक्‍टरवर झाली आहे. गेल्या वर्षीपेक्षा यंदाच्या हंगामात पाच टक्‍क्‍यांनी रब्बीच्या क्षेत्रात घट झाली आहे.

तालुकानिहाय रब्बीतील अंतिम पेरणी क्षेत्र (हेक्‍टर)

लुका	क्षेत्र
मिरज	२५ हजार ६६६
जत	७८ हजार ४११
खानापूर	१० हजार ५५१
वाळवा	१४ हजार ५३६
तासगाव	१० हजार ४९४
शिराळा	५ हजार ७०८
आटपाडी	२४ हजार २३५
कवठेमहांकाळ	२२ हजार ६२१
कडेगाव	१० हजार ५८०
पलूस	८ हजार २३०.