राधेश्याम मोपलवार पुन्हा `एमएसआरडीसी`त रुजू

मुंबई : बोरिवली येथील भूखंडाची स्वस्त दरात विक्री आणि सतीश मांगले यास धमकाविल्याप्रकरणी एमएसआरडीसीच्या उपाध्यक्ष पदावरून दूर करण्यात आलेले सनदी अधिकारी राधेश्याम मोपलवार यांना पुन्हा सेवेत रुजू होण्याचे आदेश दिले आहेत. विशेष म्हणजे त्यांना पदावरून दूर करण्याचे आदेश मुख्यमंत्री देवेंद्र फडणवीस यांनी दिले असताना, त्या कालावधीची रजा गृहीत धरून त्यांना पुन्हा आपल्या मूळ पदावर रुजू होण्याचे आदेश राज्याच्या सामान्य प्रशासन विभागाने बजावले आहेत.

पावसाळी अधिवेशनाच्या काळात बोरिवलीतील भूखंड स्वस्त दरात विकण्यासंदर्भात मोबाईलवरील संभाषण आणि बांधकाम व्यावसायिक सतीश मांगले यास धमकाविल्याप्रकरणाचे मोपलवार यांचे संभाषण उघडकीस आले. त्यामुळे विधिमंडळात विरोधकांनी हा मुद्दा उपस्थित करत राज्य सरकारला चांगलेच धारेवर धरले. त्यावरून अखेर मोपलवार यांना एमएसआरडीसी आणि समृद्धी महामार्गाच्या प्रमुख पदावरून दूर करण्याचा निर्णय घेत चौकशी करण्याचा निर्णय मुख्यमंत्री देवेंद्र फडणवीस यांनी जाहीर केला. मात्र त्यांचा हा पदावरून दूर राहण्याचा १४५ दिवसांचा कालावधी रजेचा कालावधी मानून सामान्य प्रशासन विभागाने मोपलवार यांची रजा मंजूर करत त्यांना २७ डिसेंबर २०१७ रोजीपासून पुन्हा मूळ पदावर रुजू होण्याचे आदेश जारी केले आहेत.

सामान्य प्रशासनाच्या या आदेशामुळे मोपलवार यांना त्या दोन्ही प्रकरणांत क्लीन चिट मिळाल्याचे सांगण्यात येत असून, त्यामुळेच त्यांना एमएसआरडीसीच्या उपाध्यक्षपदी रुजू होण्यास सांगितल्याची माहिती समजते.

मोपलवार यांना पुन्हा नियुक्त करण्याचे आदेश देण्यात आल्याने मुख्यमंत्री देवेंद्र फडणवीस यांचा ड्रीम प्रोजेक्ट असलेल्या समृद्धी महामार्गाच्या प्रकल्पास चालना व गती मिळणार असल्याची चर्चा आहे.